أخبار عاجلة
الرئيسية / طويل / الشاي بيأثر على اللبن؟ طيب اللبن بيأثر على الشاي؟

الشاي بيأثر على اللبن؟ طيب اللبن بيأثر على الشاي؟

كتب: أحمد حسين

الشاي بيأثر على اللبن؟ طيب اللبن بيأثر على الشاي؟

تقريبًا، جزء كبير مننا مش بيبدأ يومه إلا بمج في حاجة ما بيشربها حسب هواه، فممكن يبقى قهوة وممكن يبقى شاي وممكن يبقى شاي بلبن، وغالبًا بيكون شاي بلبن يعني لأنه _من وجهة نظري أنا المتحيزة بقوة_ أحلاهم. بس من فترة ظهر كلام مش جديد، بس كل فترة والتانية بيظهر من تاني، عن إن الشاي بلبن  مُضر، وإنه يعتبر من العادات الغذائية السيئة اللي أغلبنا بيعملها كل يوم.

طب ليه يعتبر شيء سيء؟ لأنه بحسب كلام بعض الدراسات بيقلل من القيمة الغذائية للشاي واللبن، ده غير إن حمض التانيك (مركب قابل للذوبان في الماء) اللي موجود في الشاي بيساهم في تقليل امتصاص الكالسيوم والفوسفور، وكمان بروتين الكازيين الموجود في اللبن بيعيق امتصاص المركبات الفلافونويدية (مركب كيميائي موجود في الشاي والكاكاو) المضادة للأكسدة.

طيب هل الكلام ده حقيقي؟

مبدئيًا كدة موضوع الشاي بلبن ده موضوع مطروح من فترة كبيرة وفيه جدل واسع. بحسب الدراسات العلمية اللي تمت فالموضوع مش واضح بشكل دقيق، يعني في دراسة أجريت سنة 2007 في جامعة أبردين في المملكة المتحدة قالت إن الإجابة على سؤال ”هل اللبن بيأثر على القيمة الغذائية للشاي ولا لأ؟“ مش واضحة، وإنه مفيش أي دليل واضح على تأثير اللبن على قيمة الشاي الغذائية (بكل أنواعه) .

اتفق مع الدراسة دي ”سايمون لانجلي إيفانز“، اللي كان أجرى دراسة مشابهة سنة 2000، بالرغم من إن نتائج دراسة إيفانز كانت مختلفة، وإنه بالفعل وجد إن اللبن لغى مضادات الأكسدة الموجودة في الشاي، إلا إنه قال إن الأمر ضبابي تمامًا وغير واضح، ولحد دلوقتي مفيش تجربة قالت إنه مزج اللبن بالشاي مُضر بشكل قاطع.

لكن البعض كان ليهم وجهة نظر مختلفة. صفحة على الفيس بوك خاصة بأحد الدكاترة كتبت إن في دراسة ألمانية قالت إن إضافة اللبن للشاي بتقلل من مميزات الشاي وتأثيره الواقي على أمراض القلب، ده غير إنه في أحد المواقع الطبية العربية قيل إن اللبن السائل _مش المجفف_ اللي بيتم مزجه بالقهوة مابيحصلش فيه حاجة، لكن لو تم مزج اللبن بالشاي، فده هيقلل من فوائد اللبن ومن فوائد الحديد اللي فيه، وجريدة نيويورك تايمز كتبت نفس الكلام برضه.

طيب هل اللبن بيأثر برضه على مشروبات تانية زي النسكافية والكاكاو؟ في الحقيقة إنه مفيش كلام كتير يخص النسكافية والكاكاو في موضوع تأثير اللبن دة، لكن لو اللبن كان بيأثر مثلًا على الفلافونويد الموجود في الشاي فهو أكيد بيأثر على الكاكاو بالمثل.

طيب يعني من الآخر، نشرب مج الشاي بلبن الصبح قبل ما ننزل ولا لأ؟

الحقيقة إنه زي ما انتوا قرأتوا كده، مفيش إجابة واضحة لحد دلوقتي، دراسات بتقول إن الموضوع عادي بس يُفضل تشرب مج (أو كُباية) واحد بس، سواء بقى شاي أو قهوة أو شاي بلبن، لأنه الإفراط في تناول أي شيء أمر مش صحي، زائد كمان إنك لو بتحاول تمشي على الدايت، فالإفراط في تناول الشاي بلبن مش هيكون كويس بالنسبة لك، بسبب نسبة الدهون اللي بتكون في اللبن.

في بعض المواقع كمان نصحوا بشرب الشاي من غير لبن بس لمرة واحدة في اليوم فقط برضه، أو شرب الشاي الأخضر من غير إضافات (لبن أو سكر)، أو لو حتى مابتبحش المشروب يكون من غير سكر ممكن تضيف عسل، أو ليمون لو بتحب المشروب يكون أكثر مرارة يعني.

وعمومًا، عدم الإفراط في أي تناول أي شيء هيكون أمر لطيف لك، إلا لو انت مابتقدرش تهضم اللبن مثلًا، ساعتها يُفضل تزور طبيب في أقرب وقت علشان تعرف إيه المشكلة.


المصادر

Comments

comments

(Visited 21 times, 1 visits today)

عن Eng.Ahmed

شاهد ايضا

البراند : أبو قرش زي أبو قرشين؟!

البراند : أبو قرش زي أبو قرشين؟!

كتبت: مها طـه حاليًا الوضع الاقتصادي لا يخفى على حد، وبناءًا عليه زادت أسعار سلع …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *