هل تصاب الحيوانات بالفوبيا

هي الحيوانات بتصاب بالفوبيا زينا؟!

كتبت: شيرين الدرستاوي
طبيبة بيطرية – كلية الطب البيطري جامعة القاهرة

هنا هنستكمل المقارنة اللى عملناها في المقالين اللي فاتوا بين الحيوان والإنسان واللي فيها اتكلمنا عن انتحار الحيوانات وتأثير العلاج بالوهم عليهم، واللي أثبتت إن فعلا فى تشابه ما بينا وبينهم فى حاجات كتير. طبعًا مهما وصل التشابه لكن هيظل الانسان متربع على قائمة المملكة الحيوانية بدون منازع .

المرة دي هنتعرف فى المقال عن الفوبيا في الكلاب بمختلف أنواعها:

في الأول خلونا نعرف إن الفوبيا هى حالة مستمرة من الخوف الشديد باستمرار وجود مسبب بعينه مع التعرض المتكرر ليه. وفى بعض الأحيان الحيوان أو الكلب بيكون اتعرض للشئ اللي مصاب بالفوبيا تجاهه مرة واحدة بس وساعات الخوف بيكون من شئ ماحصلش أصلا .

الفوبيا عند الكلاب أنواع مختلفة برضه: نوع بسبب الحيوانات، نوع بسبب عوامل طبيعيه ( العواصف، المياه، المرتفعات)، نوع بسبب الخوف من الحقن، الخوف من الصوت العالي، الخوف من ملابس شخصيات معينة. كل الأنواع دى بيصاب بيها الكلاب والبني أدمين زى بعض عادى .

و دلوقتي هنستعرض أمثلة مختلفة لبعض حالات الفوبيا فى الكلاب:

  • الخوف من الحشرات: مابل عايش فى مدينة ريفية فى نيو إنجلند، عنده كلبة لابرادور لونها أسود عمرها سنة ونص، كانت بتظهر سلوك مختلف لما بتشوف نوع معين من أنواع الحشرات الطائرة (deer flies)، وبيتمثل سلوكها ده فى إنها بتجري مفزوعه تدور على مكان تستخبى فيه، وتنزل تحت أي حاجة. مابل لاحظ طبعا سلوك الكلبة بتكرار تعرضها للحشرة وسلوكها اللى بيتغير بعدها، وفي مقابل السلوك ده سلوكيات الأطفال فى حالة خوفهم الشديد من الدبابير لدرجة إنهم يخافوا من أي حاجة لونها أصفر وأسود مع بعض.

  • خوف الكلاب من أشخاص بعينها موجود زى ما فى ناس بتخاف من حيوانات بعينها.

  • خوف الحيوانات من العواصف الرعدية زى ما فى ناس بتخاف من أصوات الرعد.

  • الخوف من الطبيب البيطرى علشان مايخدش منهم عينة الدم تمامًا زى الأطفال اللى بتخاف تروح لدكتور علشان مايدهاش حقنه.

  • نوع تانى من الخوف بتبين قد إيه الكلاب مرتبطة بأصحابها هو الخوف من الانفصال عن هم أو إن صاحبها يخرج ومايرجعش وممكن من كتر خوفه و اكتئابه يحس إن البيت بقى سجن وإنه عايز يهرب، فيقعد يبهدل فى البيت، وفي كمان اللى ممكن يصاب بالقئ أو ييجيله إسهال من الخوف والزعل.

  • وأخيرا الخوف من أزياء شخصيات معينة (costumed characters)، ممكن الكلب يخاف من لبس شخصية شافه فى احتفال من الاحتفالات بالهالووين.

وأخيرًا من اللي قلنا واضح إن الكلاب فعلا بتشعر بالخوف زينا وهو الأمر المنطقى لإن من الناحية التشريحيه لمخهم، هنلاقى عندهم مراكز للخوف زينا وجهاز عصبى زينا، بيحسوا وبيفرحوا وبيخافوا وعشان كده بنقدر نعتمد عليهم في التجارب الطبية لإننا ممكن نعتمد على حاجة زي كده في الأبحاث والدراسات علشان يكون كلام مدعوم بأدلة وتجارب.

المرجع : psychologytoday

تعليقات

comments

(Visited 52 times, 1 visits today)

اترك رد