أخبار عاجلة
الرئيسية / ليه وإزاي؟ / عن الرؤوس السوداء: مستر أكس مش ممكن ينتهي!

عن الرؤوس السوداء: مستر أكس مش ممكن ينتهي!

كتبت: مها طـه

كلنا وخصوصًا البنات بنحب نبص في المرايا كل يوم الصبح، نلاحظ حبوب هنا، علامات إجهاد هنا، تجعيدة صغيرة هناك، هالات سوداء، وعلى ذكر السواد تأتي ”الرؤوس السوداء“ كمشكلة رخمة ودمها تقيل علينا كلنا، نجرب حلول كتير وبرضو مفيش فايدة، لاصقات تلاقي، لوشن ممكن، غسول من ماركة غالية مايضرش، وأحيانًا حمام بخار وماسكات (Musk)، لكن في الأخر النتيجة بتكون ولا حاجة تقريبًا، تقل شوية ومفيش وترجع تاني! بس مهم نعرف إيه هي الرؤوس السوداء دي اللي كلنا بنسعى عشان تروح لأن منظرها مش لطيف؟ وليه بتتكون أصلًا؟

في الحقيقة شوية النقط اللي بتظهر على مناخيرك غالبًا دي، إعلانات مستحضرات التجميل هي اللي بتسميها ”الرؤوس السوداء“ لكن هي في الحقيقة مش كدة، هي مجرد بُصيلات شعر عادية، وبتقوم بوظيفتها الطبيعية اللي المفروض تقوم بيها أصلًا!

الرؤوس السوداء هي نوع من أنواع حبوب البشرة غير المُلتهبة، يعنى لا بتحمر ولا بتبقى بارزة زي حب الشباب كدة، الاسم الطبي للرؤوس السوداء هو ”open comedones- الكوميدونات المفتوحة“، والكوميدو بمعنى تاني هو المسام المسدودة.

مسام البشرة ممكن تتسد عن طريق الإفراز الزيادة للغدد الدهنية في الجلد، الغدد الدهنية دي بتكون موجودة قريب من بصيلة الشعرة، وبتفرز ”زيت“ أو بمعنى أصح مادة دهنية عشان تساعد الشعرة تخرج من طبقة البشرة في الجلد، أحيانًا بقى الإفرازات الدهنية دي بالإضافة لخلايا الجلد الميتة والبكتريا الموجودة على الجلد بيكونوا خليط _كتلة كثيفة_ بيتراكم جوا المسام دى ويسدها.

ولأن الرؤوس السوداء بتُعتبر مسام مفتوحة، فالخليط ده بيطلع على السطح ويتعرض للهواء، الخليط ده بيتعرض للأكسدة على السطح، ويتحول للون الغامق اللي يكاد يكون أسود ده، النقط السوداء اللي بتظهر على جلدك في الحالة دي، هي شكل طبيعي للجلد بتتسمى بـ”الخيوط الدهنية“، الخيوط الدهنية هي المنتج النهائي لتراكم الإفرازات الدهنية والجلد الميت اللي بيتجمعوا حوالين بُصيلة الشعرة،  أكيد لو حد جرب قبل كدة اللاصقات اللي بتتباع عشان تشيل الرؤوس السوداء، وحاول يبص هيلاقيها طالعة وكأن ليها جذور كدة ممتدة تحت الجلد، أهي الجذور دي هي ”الخيوط الدهنية“ واللي في الحقيقة موجودة في كل الأماكن في جسمك ووشك لكنها واضحة على الأنف بشكل كبير.

ليه بقى بتكون الرؤوس السوداء أوضح على الأنف؟

الرؤوس السوداء بتبقى أوضح عشان الثقوب اللي على الأنف أكبر، وكمان الغدد الدهنية في المنطقة دي بالإضافة للجبهة بيبقى إفرازها من المواد الدهنية أكبر. على عكس الرؤوس السوداء، فالخيوط  الدهنية بتبقى عبارة عن إنتاج طبيعي للإفرازات الدهنية ومش بتُعتبر مرض أو عدوى، الخيوط دي ممكن بالفعل تساعد المسام على إنها تفرز مواد دهنية أكتر أصلًا.

وكمان على عكس الرؤوس السوداء، فالخيوط دي ومهما حاولت تشيلها هترجع تاني ولا كأن في حاجة حصلت لأن الغدد الدهنية لسه محافظة على نفس القدر من إنتاج المواد الدهنية لأن دي وظيفتها، ولأن الإفرازات الدهنية مش بس بتساعد في خروج الشعرة لكنها كمان بتحمي الجلد وتخليه ناعم ومُرطب،ومضاد للمياه، ولو الغدد مش بتفرز المواد الدهنية بالشكل الكافي الجلد بيتعرض للجفاف والتشققات وغيرها من مشاكل البشرة اللي ليها علاقة بنقص الترطيب الطبيعي.

طب والعمل إيه برضه؟!

دلوقتي نقدر نقول إن الخيوط الدهنية دي ممكن تتطور وتاخد شكل الرؤس السوداء أو الحبوب غير المُلتهبة دي، لو الجلد مش دايمًا نضيف أو لو حضرتك بتستخدمي منتجات ومستحضرات تجميل ممكن تؤدي لانسداد المسام. الدكاترة بقى تقريبًا أجمعوا على إن محاولة إزالة الرؤوس السوداء أو الخيوط الدهنية عن طريق اللاصقات أو غيرها من الطرق اللي بتكون عنيفة شوية وغيرها من بعض اقتراحات غريبة زي استخدام الغراء الغير سام وغيره ممكن جدًا يسبب التهابات في الجلد وعدوى وأحيانًا ممكن يسيب علامات مكانها وعشان كدة الحاجة الوحيدة اللي بينصح بيها الاطباء، هي إننا نسيب الغدد الدهنية تقوم بوظيفتها بشكل طبيعي، ونحاول بشكل مستمر ننضف البشرة باستخدام صابون طبي عشان يقضي على البكتريا ويحافظ على نضارة البشرة ويمنع تراكم الزيوت وخلايا الجلد الميت جوا المسام.


المصادر

Comments

comments

(Visited 4 times, 1 visits today)

عن Eng.Ahmed

شاهد ايضا

العالم محاكاة كمبيوتر: عرض ترومان المستمر

العالم محاكاة كمبيوتر: عرض ترومان المستمر

كتب: أحمد حسين سنة 1998، صَدَر فيلم «عرض ترومان» أو The Truman show، من إخراج …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *