أخبار عاجلة
الرئيسية / الملف / مزارع الطحالب: مصدر للأكل واللبس وكمان الطاقة!

مزارع الطحالب: مصدر للأكل واللبس وكمان الطاقة!

كتبت: مها طـه

غالبًا معرفتنا بالطحالب ببتلخص في ”السوشي“ أو إنها ”نباتات“ خضرة من اللي يتعوم على وش الميه في الترع وغيره. الحقيقة إن الطحالب مش نباتات أصلًا ولكنها مملكة مُستقلة في علم التصنيف، تحتها بتندرج حاجات كتير أوي، مش كلها خضراء، ولا كلها ينفع تتاكل لأن في كتير منها سام! اعرفوا أكتر عن مملكة الطحالب من هنا.

انطلاقًا من الأهمية الكبيرة للطحالب، بدأت مجموعة من الباحثين فى المعهد الملكى للتكنولوجيا فى السويد مشروع لمزارع الطحالب البحرية اللى بتنموا على حبال تحت الماء. الباحثون دول جمعوا كميات من الطحالب الزائدة فى بحر البلطيق على ساحل جنوب السويد ثم زرعوهم فى مزرعة. بعد 6 شهور تم تنقية الطحالب وحصادها بعدها تم استخدامها فى تصنيع غذاء صديق للبيئة وأدوية وبلاستيك، بالإضافة إلى استخدامها كمصدر للطاقة.

مزارع طحالب منتجة للطاقة

الإنتاج بيكون مستمر طول السنة بس فى الشتاء بتتم الزراعة على عمق أكبر لتفادى تكون الجليد على السطح. مياه البحر بتحتوى على مغذيات كتيرة عشان كده نمو الطحالب فيها بيكون كتير. بعض أنواع الطحالب بتفرز مواد سامة لما تزدهر وطبعًا بتضر البشر و الحيوانات لما يكون تركيزها كبير، زيادة كميات الطحالب ممكن تهدد البيئة، لكن الفريق السويدى قرر إنه يتعامل مع الطحالب كمورد مش كمشكلة ممكن تهدد البيئة والإنسان.

استخدام الطحالب الزائدة وزرعها بيساهم فى زيادة الكائنات المائية، لأن الطحالب بتمتص النيتروجين والفسفور من البحر، والنيتروجين والفسفور هما أهم مركبين فى تكوين خلايا الكائنات الحية وزيادتهم بتؤدى لزيادة الكائنات الحية فى البيئة. البحار عمومًا لها قدرة إنتاجية عالية ومع ذلك البشر بيستخدموا أقل من 1% من موارد النظام البيئى البحري.

الطحالب ليها قيمة غذائية عالية جدًا، بتحتوى على فيتامينات وأحماض أمينية ومعادن. حاليًا زاد استخدام الطحالب كغذاء وكمان بقت تُستخدم فى إنتاج السكر والتوابل والزيت والعلف الحيوانى.

فريق الباحثين بيعتقد إن سواحل السويد مثالية لزراعة الطحالب، وأقاموا بالفعل مزرعة واحدة لحد دلوقتى. بيتوقع الباحثين أن التجربة هتاخد وقت لحد ما الناس العاديين يتعودوا على فكرة وجود مزرعة للطحالب، وجود المزارع دى هيحقق تنمية كبيرة بالإضافة لتحسين البيئة البحرية. مزارع الطحالب عبارة عن غابات من الطاقة تحت البحر، بتحتوى على كميات عالية جدًا من الطاقة.

 الباحثون بيخططوا لبناء مزارع كبيرة حاليًا، والاعتقاد إن الإهتمام بالمجال ده والإستثمار فيه هيزيد بشكل ملحوظ الفترة اللي جاية، فمتوقع إنه فى خلال 15 سنة هيكون فيه مزارع كبيرة على طول سواحل السويد، كما إن زراعة الطحالب هتخلق صناعة جديدة تستفيد من الطحالب فى كتير من المجالات.

المصادر:

Comments

comments

(Visited 7 times, 1 visits today)

عن Eng.Ahmed

شاهد ايضا

الخرافة والديناتولوجي: إحنا اللي دهنّا الهوا دوكو (الجزء الأول)

كتب: أحمد حسين ”المواهب .. طريقط للثراء والخلود والتأثير“ كتابٌ يؤكد مؤلفه من خلاله أن …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *