أخبار عاجلة
الرئيسية / طويل / جلسات العلاج الكهربائي: كهربا لأ .. كهربا لااااااااااااااأ!

جلسات العلاج الكهربائي: كهربا لأ .. كهربا لااااااااااااااأ!

كتبت: يارا كمال

في إحدى مستشفيات الأمراض العقلية والعصبية، أصابت أحد المرضى حالة من الهياج وأخذ يصرخ ويضرب من حوله من مرضى، فهمّ الممرضون بالإمساك به وسحبوه إلى غرفة جلسات العلاج الكهربائي، بينما هو يصرخ قائلًا: ”كهربا لأ .. كهربا لااااااااااااااأ“. لقطة كليشيه هايلة من فيلم عربي قديم أو جديد حتى، زي فيلم ”خلي بالك من عقلك“. مش بس فيلم عربي، وأجنبي كمان ماحدش هينسى فيلم جاك نيكلسون One Flew Over the Cuckoo’s Nest“ اللي فاز عليه بالأوسكار سنة 1975، كان طالع فيه مريض متمرد على رئيسة التمريض، فعقابًا ليه كانوا بيعذبوه بجلسات الكهربا.

maxresdefault

جلسات العلاج الكهربائي علاج أم تعذيب؟!

أنا كنت فاكرة إن جلسة الكهربا دي عبارة عن تصرف جاهل وسادي من الأطباء بيعذّبوا بيه المرضى ومابيعالجوهمش، بس اكتشفت إنه علاج بيُستخدم عادي وبيوصل لنتايج كويسة جدًا، بس المفروض إن المريض بيتخدّر الأول. ولو افترضنا إن فيه مستشفى للأمراض العقلية والعصبية الناس فيها ساديين إلى هذا الحد، فممكن يتسببوا بآلام للمرضى بجلسات زي دي بدون تخدير، وده بيحصل فعلًا حتى لو من باب الاستسهال، مش التعذيب.

خلونا نفهم الأول يعني إيه جلسة علاج كهربائي: هي عبارة عن تمرير شحنات كهربائية صغيرة عبر المخ، وده طبعًا تحت تأثير التخدير الكامل، وكمان بيدوّا المريض أدوية بترخى العضلات عشان يتجنبوا الحركة أثناء الجلسة. جلسات العلاج الكهربائي بتستخدم لما تكون أنواع العلاجات التانية مش جايبة نتيجة أو المريض مش مستحملها لسبب ما، زي إن واحدة حامل ماينفعش تاخد أدوية لإنها ممكن تضر الجنين، أو الناس الكبار اللي ممكن مايستحملوش الآثار الجانبية للأدوية، أو لو المريض بيفضّل جلسات العلاج بالكهربا، يعني العلاج بالكهربا خيار مش أكتر، مش بالساهل كده الدكتور ياخد المريض ويحطه على الشاحن على طول.

الجلسات دي بتعالج الاكتئاب الحاد وخصوصًا لو مرتبط بالانفصال عن الواقع أو الرغبة في الانتحار أو رفض الأكل أو لو مابيتحسنش بالعلاجات التانية. كمان بتعالج حالات الهوس الشديد، وهي حالة من النشوة أو النشاط أو الإثارة الزايدين عن الحد، وده بيحصل كجزء من الاضطراب ثنائي القطب، ومن علامات الهوس برضه، الخلل في اتخاذ القرار، والسلوك المتهوّر والخطر، وتعاطي المخدرات والذهان. برضه جلسات الكهربا بتنفع في حالات الجامود (Catatonia) ودي عبارة قلة الحركة، والحركات السريعة أو الغريبة، وقلة الكلام وأعراض تانية. الحالة دي أحيانًا بتبقى مرتبطة بالشيزوفرينيا واضطرابات نفسية تانية، وأحيانًا لأ. كمان جلسات الكهربا بتنفع مع المصابين بالخرف أو العته لما يصابوا بحالة هياج.

الأعراض الجانبية للعلاج بالكهرباء

ورغم إن جلسات الكهربا مفيدة في الحالات دي وآمنة بشكل كبير إلا إن ليها آثار جانبية رخمة حبتين. المريض بعد ما بيخلّص الجلسة من هنا، يبدأ يعاني من حالة ارتباك أو تشوّش من هنا: يعني مثلًا بيبقى مش عارف هو فين أو ليه هو في المكان ده. وممكن الحالة دي تستمر من دقايق قليلة لساعات كتير، بس نادرًا لما بتستمر لأيام كتير أو مدة أطول كمان. وبتُلاحظ الحالة دي  أكتر عند كبار السن.

كمان فيه ناس بيعانوا من فقدان الذاكرة بالنسبة للأحداث اللي حصلت قبل الجلسة على طول، أو قبلها بأسابيع وشهور، وفي حالات نادرة قبلها بسنين. أنت ونصيبك. الحالة دي بيسموها ”retrograde amnesia“. وبرضه ممكن بعض المرضى يبقى عندهم مشكلة في استرجاع الأحداث اللي بتحصل أثناء فترة علاجهم اللي بتستمر لمدة أسابيع، بس بالنسبة لأغلب الناس، حالة فقدان الذاكرة دي بتتحسّن في خلال شهور بعد ما العلاج ما ينتهي.

خلال أيام العلاج بالكهربا، فيه ناس بيحسّوا بغثيان أو صداع أو وجع في الفك أو العضلات. وزي أي إجراء طبي وخصوصًا لو فيه تخدير، ممكن تحصل شوية مضاعفات طبية. أثناء العلاج بالكهربا، ممكن ضغط الدم يرتفع ومعدل ضربات القلب يزيد، وفي حالات نادرة، ممكن العلاج يؤدي لمشاكل خطيرة في القلب، فلو المريض عنده أصلًا مشاكل في القلب، العلاج بالكهربا هيبقى خطر عليه.

طبعًا الأعراض الجانبية دي بتختلف من شخص للتاني. يعني مثلًا فيه راجل اسمه ”جون ويتي“ قال للـ”بي بي سي“ إنه وهو عنده 64 سنة، أُصيب بالاكتئاب نتيجة انهيار جوازه والضغط اللي اتعرض له في شغله، وخد جلسات علاج بالكهربا لإن الأدوية والعلاج النفسي العادي ماجابوش معاه نتيجة، وبالفعل جلسات الكهربا حسّنته جدًا. في حين إن فيه ست اسمها ”هيلين كرين“ أخدت جلسات كهربا في أواخر التسعينات، واللي بتقول إنها مسحت لها من ذاكرتها أحداث مهمة زي وفاة أمها.

Bilateral treatment Right unilateral treatment

الأعراض دي كمان بتقل حسب وضع الأقطاب الكهربائية على المخ. فيه علاج أحادي الجانب الأيمن (Right unilateral treatment) وفيه علاج ثنائي(Bilateral treatment) . في العلاج الأحادي الجانب، بيتحط قطب كهربائي على قمة الرأس والقطب التاني على الناحية اليمين من الرأس، أما في العلاج الثنائي، بيبقى القطبين الكهربائيين على جنبين الجمجمة. العلاج أحادي الجانب بيبقى أبطأ من العلاج الثنائي، بس الآثار الجانبية اللي مرتبطة بفقدان الذاكرة بتكون أقل في العلاج أحادي الجانب. والمفروض إن كورس العلاج بالكهربا بيستمر من 6 لـ 12 جلسة (الكلام ده في أمريكا).

كهربا

الطريقة دي في العلاج ظهرت سنة 1938 عن طريق اتنين علماء أعصاب إيطاليين، بس قبل منتصف الخمسينات، كان المرضى مابيتخدّروش أثناء الجلسات، فكانت الجلسات بتسبب لهم تشنجات ممكن تؤدي إن عضمهم يتكسر فيها، ويمكن ده اللي سايب فكرة إن الجلسات دي هدفها تعذيب المريض في دماغنا. بس للأسف لحد دلوقتي فيه لسه بلاد بتعالج بالكهربا من غير تخدير. فيه أطباء في مستشفى في بانكوك في تايلاند لقوا إن 56% من المرضى في 14 دولة آسيوية بيتعالجوا بالكهربا من غير تخدير. وهنا بقى ممكن نخاف فعلًا!

إزاي جلسات العلاج الكهربي بتعالج من الأمراض العقلية؟

الحقيقة ماحدش يعرف لحد دلوقتي بشكل أكيد، بس فيه نظرية بتقول إنه بيسبب تغيير في النواقل العصبية اللي بتبعت الرسايل الكيميائية في المخ، وفيه نظرية تانية بتقول إنه بيعدّل من تنظيم هرمون التوتر في المخ واللي بيأثر على الطاقة والنوم والشهية والحالة المزاجية.

سنة 2011، فيه طبيب نفسي من مستشفى جامعة كوبنهاجن لاحظ إن جلسات العلاج الكهربائي بتزوّد إفراز هرمونات معينة واللي بتختل في حالة الاكتئاب. وفيه ناس تانية رجّحت إن الكهربا بتحفّز النمو العصبي وبتساعد على إعادة بناء المناطق اللي في المخ اللي بتحمي من الاكتئاب، وفيه فكرة كمان بتقول إن الكهربا بتعيد تشغيل أنشطة المخ وده بيساعد على الارتياح.

فيه دراسة بتقول إن العلاج بالكهربا بيخفف الاكتئاب الحاد بنسبة  86%، وإنه كمان مفيد في تقليل فرض الانتكاس، بعد ما المرضى يخلّصوه وياخدوا علاجات تانية من باب المتابعة. يعني مفيد وحلو أهوه. الفكرة بس عاملة زي إني أعمل لواحد عملية من غير بنج. يا لهوي، ده لا يمكن يتحمّل الألم. هي نفس الفكرة، مش معنى إني بعالج المريض إني أعذّبه. أما بقى لو غرض الجلسة هو التعذيب، فدي قذارة بقى وسادية لا نفتقدها في زمننا الحالي للأسف.

 

المصادر:

http://www.scientificamerican.com/article/the-truth-about-shock-therapy/

http://www.mayoclinic.org/tests-procedures/electroconvulsive-therapy/basics/definition/prc-20014161

http://www.mayoclinic.org/tests-procedures/electroconvulsive-therapy/basics/why-its-done/prc-20014161

http://www.mayoclinic.org/tests-procedures/electroconvulsive-therapy/basics/risks/prc-20014161

http://www.nimh.nih.gov/health/topics/brain-stimulation-therapies/brain-stimulation-therapies.shtml

http://www.bbc.com/news/health-23414888

http://www.psych.med.umich.edu/ect/how-does-ect-work.asp

مصادر الصور:

http://squidnova.com/electricity/

https://www.youtube.com/watch?v=4b0tOyUcRlA

Comments

comments

(Visited 606 times, 5 visits today)

عن Eng.Ahmed

شاهد ايضا

دليلك إلى تكيسات المبايض

دليلك إلى تكيسات المبايض: معلومة تهمك

كتبت: مها طـه فيه ستات كتير بييجي لهم تكيسات مبايض في فترة في حياتهم، وأغلب …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *