عن نيون


بتخاف من العلوم؟!.. تعالى بس ما تتكسفش.. بتخاف منها ولا بتحسها مجعلصة ومش ع السكة والدوغري.. طلاسم ومعادلات ومركبات أه شكلها مهمة بس مملة .. هنعمل بيها إيه لو مش فاهمينها!!
إحنا هنقولك عارف العجلة؟ أه العجلة أكيد سمعت جملة “أصلك مش هنخترع العجلة” دي كتير؟ هنا فعلا إنت مش هتخترع العجلة لأنها أصلا موجودة. بس يهمنا إنك تتعرف على إزاي بتتركب وتتصنع وتستفيد منها بأكتر من شكل.. وكل ده هيحصل بشكل بسيط، ومش هتخرج غير وإنت فاهم وراسي ع الحوار.
نركز مع بعض بقى. الخطة هتمشي كالآتي: هنشتغل على خطين الأول هنكسر فيه ونهدم.. أه أبراج الهجص البلدي اللي قايمة جوه دماغنا، والخط التاني هنشتغل فيه سوا على نضافة نتعرف على إزاي العلوم موجودة وبقوة في حياتنا، إزاي هي مهمة وحيوية ولطيفة وتتحب كمان.. أه والله كيوتة، بس لو استهترت بيها أحيانا بتبقى وحش مخيف هيزعلنا كلنا.. وعلى إيه الطيب أحسن 😀
” نيـون ” موقع إلكتروني هدفه تقديم محتوى علمي مبسط باللغة العربية والعامية المصرية.. بنقربها مش بنعربها.

في ” نيـون ” هنقرا :

  • النشرة: نقوم بتغطية شبه يومية لأخر المستجدات من اختراعات، اكتشافات، وغيرها في الساحة العلمية.
  • نوّرها: مدخل لفهم العديد من موضوعات المقالات القادمة حيث يقدم التعريفات الأساسية، كما يجيب أيضًا عن سؤال ما هو؟
  • إزاي وليه؟: سنجيب عن الأسئلة المطروحة (لماذا وكيف) حول العديد من الأمور في حياتنا اليومية.
  • حيٌ يرزق: كل ما يتعلق بحقائق وغرائب عن الكائنات الحية بمختلف أنواعها وأحجامها من أبسطها لأكثرها تعقيدا.
  • هجص بلدي: نخصصه للأساطير الشعبية والشائعات المنتشرة حولنا ونتداولها أحيانًا بشكل شبه يومي.
  • الملف: الملف يطرح موضوعا بعينه يقدمه لكم في سلسلة مقالات نصف شهرية.

مين إحنا:

_20160113_100256

محمد عبد المجيد -صاحب الفكرة والممول الرئيسي

اشرب وانت قاعد، مش هيجيلك تليف كبدى. كُل سبع بلحات، وجسمك هيبقى ليه هالة زرقاء من الإلكترونات الواقية من الحسد. كُل قشطة بتفرتك السرطان، وإن لم تنشرها ليلتك طين. اللهم بلغت.
مساء الخير أو صباح الخير أينما كنتم. أنا محمد عبد المجيد، مهندس معمارى، وبحب العلوم. المعلومات أعلاه عن القشطة والبلح. طبعاً …بلح! و”معلومات” زيها كتير بتنتشر بينا كشعوب ناطقة بالعربية انتشار واسع، في طيّاتها من الجهل ما يكفي لهدم العقول السليمة بالفطرة. أنا من فريق عمل نيون، اللى بيحاولوا يضيفوا للثقافة العلمية. بنحاول في العتمة ننور لمبة. لمبة نيون صغيرة لكن أملنا إن وهجها وضوءها يبقى كبير.

DSC_0938شيماء شيماء عفيفي   مؤسس والمدير التنفيذي

صباحكم او مساكم فل، أنا شيماء عفيفي مهندسة معمارية من 12 سنة، اشتغلت منهم 11 سنة مهندسة، قابلت ناس كتير بمختلف الدرجات العلمية والأعمار، واكتشفت إن المعرفة العلمية بتخلي تفكير الواحد مختلف وأفقه واسع، وأدركت إن العلوم جزء لا يتجزء من حياتنا. اللغة كانت أكبر مشكلة بتواجه الناس في فهم العلوم، من زمان نفسي أدور علي معلومة بالعربي، وألاقيها صحيحة وبصياغة أفهمها بسهولة، هو ده الحلم اللي جمعني مع أصدقائي فريق عمل نيون، صحيح معنديش ملكة الكتابة لكن دوري أساعدهم في حاجات تانية كتير علشان نحول حلمنا لحقيقة، ونجوجل بالعربي وإحنا مطمنين.

12606868_947495812013612_1074096942_nآية أشرف المرسي  – مؤسس ومدير التحرير

يسعد صباحكم ومساكم، محدثتكم آية أشرف المرسي، خريجة إعلام القاهرة، قسم صحافة. أنا كآية يصعب عليّ إجابة سؤال إيه أكتر حاجة مفضلة عندك؟ عن أي حاجة  في المطلق، سؤال مربك ومحير وفضفاض أوي كده.
لكن هاهنا أكتر حاجة بحبها التفاصيل، الشيطان يكمن في التفاصيل، والعلوم والمعرفة زيه كذلك. هنا ممكن تعتبروني الذوّاقة، وأحيانًا أشبه بفار تجارب، وذلك من أجل ضمان سلامة المنتج وجودته،  وفي عرف أهل الصحافة ”الديسك“. الخلاصة، قاريء عادي تمامًا، غير ضليع بالعلوم، بيحاول معاكم إن كلنا نتشجع، ونديها فرصة تانية لأنها تستحق وزيادة، أه استنوني في ”هيدروجينا“.

12583854_947495802013613_1507262886_nمها طه – محرر

مساء الفُل، معكم مها طه خريجة علوم حلوان وما أدراكم ما جامعة حلوان، قسم حيوان، وده مش معناه خالص إنى طبيبة بيطرية. طول عمرى بحب العلوم، وبهتم بالاكتشافات العلمية، بحب القراءة واكتشفت إن الكتابة عن اللي قرأته ممكن يكون شيء مهم ولطيف.
اشتغلت مدرسة لفترة، ولقيت إن ممكن يكون عندى القدرة على شرح وتبسيط العلوم، ويمكن ده كان حلم بالنسبة لي، ولو بشكل غير مباشر، إني أوصل العلوم للناس ببساطة. لأن حقيقي الموضوع به من المتعة والانبهارات الكثير.

 

12584139_947495805346946_22360444_nأحمد حسين – محرر

صباح الفُل، أنا أحمد حسين، مهندس وبكره الهندسة، أو على الأقل بكره كلية الهندسة، وما يتعلق بالمجال الهندسي عندنا، لازم نتكلم بصراحة يا جماعة. بحب الكتابة، وبحب القراءة، بس كنت بكره كتب المدرسة كلها، ومازلت. الحقيقة، العمر أقصر من إن الواحد يقرا أي شيء ممل، والعلوم عادةً بتكون مملة وكمان معقدة، بس مهمة جدًا، وبقى حتمي إننا نقرا عنها ونفهم تطبيقاتها في حياتنا، وهتفيدنا إزاي.
فهنا، أنا بحاول أفهم وألخص لكم اللي فهمته عن علوم مختلفة، والأهم بجتهد إن ده مايكونش بشكل معقد أو ممل.

12571184_947495808680279_85988573_n

يارا كمال – محرر

مسأكم جميل، أنا يارا كمال، خريجة إعلام القاهرة، وأصلًا كنت أدبي.
بحب السينما ونفسي أكتب وأخرج أفلام. بحب المزيكا، وبتعلم أعزف كمانجة دلوقتي. يعني من الآخر أبدو لأي حد إني آخر واحدة ممكن تكتب عن العلوم. بس الفكرة إن باعتبار معرفتي العلمية محدودة، وعاوزة أفهم، وغالبًا كلنا على نفس المستوى من فهم العلوم، فكل اللي بعمله إني بحاول أفهم المعلومة من مصادر موثوق فيها، وأترجمها واكتبها زي مافهمتها بمصطلحاتها، وبتفاصيلها. يعني، هنا إحنا هنحاول نفهم مع بعض.


معًا، سنحاول أن نهدم أي كلام غير مبني على أساسِ علمي، ونفهم ما يستعصي على فهمنا .

 لأن العلم مش بس نور، العلم حرية!

والسلام ختام.

(Visited 83 times, 1 visits today)