”طاقة البول“ ممكن تنقذ حياتك!

كتبت: مها طه

بعد مؤتمر المناخ فى باريس واتفاق 195 دولة على تقليل انبعاثات الكربون وبالتالى تقليل استخدام الفحم والبترول كمصادر للطاقة، العالم بيتجه دلوقتى لتوليد الطاقة من مصادر متجددة غير ضارة للبيئة حتى المصادر الغريبة وغير التقليدية. مجموعة من الباحثين فى المملكة المتحدة قرروا إنهم يشتغلوا على أحد مصادر الطاقة غير التقليدية دى، فاعتمدوا على نظام فريد من نوعه لاستخدام قوة البول فى توليد الطاقة!

طاقة البول أحدث مصادر الطاقة المتجددة

الباحثين دول جابوا شرابات وملوها بخلايا لتوليد الطاقة من الميكروبات والكائنات الدقيقة (MFC)، تم تغذية الخلايا دى بالبول اللى بيتم ضخه فى الشراب عن طريق خطوات الشخص اللى بيلبسه، الجهاز ده يُعتبر أول جهاز لتوليد الطاقة بيعمل بشكل ذاتى عن طريق الشخص اللى لابس الشراب نفسه، وبيوفر طريقة تتحول بيها فضلات طبيعية فى الإنسان لمصدر للطاقة، الطاقة الناتجة عنه تقدر تنقل إشارة لاسلكية لجهاز الكمبيوتر.

2F47D52E00000578-3356270-image-a-108_1449852297558

”لوانيس ليروبولس“، الباحث فى جامعة غرب إنجلترا (بريستول) قال إنهم فعلًا قدروا يولدوا طاقة تقدر تشغل موبايل باستخدام طاقة البول، وحاليًا بيحاولوا استغلال النجاح ده فى تطوير تقنية لتوليد الطاقة باستخدام أشياء يمكن لبسها.

فى الطبيعى بيتم استخدام الخلايا الميكروبية لتوليد الطاقة عن طريق تمرير تيار كهربى لكن هنا تم استخدام مضخة لتدوير البول على خلايا الوقود الميكروبية دى بالاعتماد على حركة الإنسان، الجهاز بيتكون من أنابيب لينة موجودة تحت الكعب _فى الشراب_ عشان تضمن إن البول يتم ضخه فى أثناء المشى وبالتالى يتم توليد الطاقة من الخلايا الميكروبية، فى التجربة الجهاز كان قادر إنه يبعت إشارة كل دقيقتين لجهاز الاستقبال المتوصل بالكمبيوتر.

urine-power-socks-3

النتايج اللى وصلها البحث ده مش بس مجرد تطوير لفكرة توليد الطاقة باستخدام الملابس لكن كمان تخيل لو تم إقناع الرياضين بلبس الشرابات دى، قد إيه ممكن نولد طاقة من المصدر ده ونحتفظ بيها لوقت ممكن تختفى فيه كل مصادر الطاقة ويبقى الحل الوحيد هو الاستعانة بطاقة البول.

التقنية دى بتفتح المجال لاستخدام الفضلات لتوليد الطاقة للأجهزة الإلكترونية المحمولة وعن طريق جزء من اللبس بمجرد زرع خلايا ميكروبية مولدة للوقود فيه. تخيل لو انت فى مشكلة وموبايلك هيفصل و إنت لابس شراب من اللى بيولد الطاقة، فعليًا الشراب ده ممكن ينقذ حياتك بإنه يخليك تقدر تبعت رسالة استغاثة.

بس ماينفعش ننسى إن الشراب ده من غير الخلايا الميكروبية مش هيقدر يولد طاقة. فى الوقت الحالى لسة لم يتم تطبيق التقنية دى، لكن بمجرد ما يتم تطبيقها مفيش حد هيستغنى عن وجودها فى أى مكان، ويكفى تمامًا إن البحث وضح إمكانية استخدام الفضلات سواء من بشر أو حيوانات فى توليد الطاقة المتجددة.

المصادر:

تعليقات

comments

(Visited 6 times, 1 visits today)

اترك رد