أخبار عاجلة
الرئيسية / ليه وإزاي؟ / خلطة الزبادي بالليمون؛ فوز بطعم الخسارة يا كابتن مدحت!

خلطة الزبادي بالليمون؛ فوز بطعم الخسارة يا كابتن مدحت!

كتب: أحمد حسين

تعالى نفترض مثلًا إنك يعني فكرت تعمل دايت، غالبًا هتسمع نصايح كتير تخص الموضوع ده، هتلاقي معظمها بيدور في نطاق الأكل من غير سمنة وزيت أو دهون، وتقليل السكريات طبعًا والحلويات والشيكولاتة وغيرهم من الحاجات اللي دايمًا بترتبط بزيادة الوزن.

من ضمن النصايح دي، هتلاقي حد ينصحك إنك تاكل كوباية زبادي معصور عليها نص ليمونة. هينصحك بده علشان تبقى أكلت أكلة مغذية وخفيفة وسعراتها الحرارية قليلة. وهي فعلًا كذلك، لكن هل الأكلة الخفيفة دي لو أكلناها كل يوم هيبقى ليها أضرار؟ سواء على المدى القريب أو البعيد؟

الحقيقة إننا قبل ما نذكر الأضرار لازم نذكر فوايد خلط الليمون بالزبادي. الزبادي عمومًا بيعتبر من أكتر الأشياء المفيدة اللي ممكن تاكلها وتنفعك بقيمة غذائية، وفي نفس الوقت سعرات حرارية قليلة، خصوصًا الزبادي خالي الدسم. زائد كمان إنه بيساعد في الحفاظ على الأنسجة العضلية؛ اللي بتعتبر شيء أساسي في الحفاظ على سرعة الأيض/التمثيل الغذائي (Metabolism). الزبادي بيحتوي كمان على بعض البكتيريا المفيدة والتي تقوي وظائف الجهاز الهضمي ومناعته.

أما الحمضيات، والليمون تحديدًا لهم آثارًا قوية على الجسم فيما يخص إزالة السموم (Detoxifying)، عن طريق مساعدة الليمون للكبد اللي بدوره بيزيل السموم من مجرى الدم. وعلى الرغم من طبيعة الليمون الحمضية، إلا إنه بيساعد الجسم في الحفاظ على حالته القلوية. ده طبعًا غير إن الليمون يعتبر مصدر مهم لفيتامين C، واللي بيعتبر أحد مضادات الأكسدة القوية اللي بتحمي أغشية الخلايا، وبيساعد كمان على تجديد البشرة والتئام الجروح.

lemcurd1

طيب، إيه اللي ممكن يكون مُضر في حاجات زي دي؟

في مرض خطير اسمه ”متلازمة الحليب القلوي – Milk Alkali Syndrome“، المرض بيجي نتيجة للإفراط في تناول منتجات الألبان، وده بيزوّد الكالسيوم بشكل كبير جدًا فوق المطلوب في الجسم، مما يترتب عليه ألم في منطقة الكلى، والتبول المفرط، والإرهاق، وضربات القلب غير المنتظمة، وغيرها من الأمراض. زيادة على كدة كمان، الأحماض اللي بتكون موجودة في الليمون غالبًا ما بيتم ربطها بتسوس الأسنان، بسبب تأثيرها على المينا (المادة البيضاء اللي بتحمي الأسنان).

باختصار، في كام نقطة كده ممكن نفهم بيهم الموضوع ده:

  • بالرغم من وجود أدلة وأبحاث عن فوايد الليمون والزبادي، إلا إنه مفيش أي شيء مميز بينتج عن خلط الإتنين ببعض.
  • زيادة المواد المغذية ضمن نظام أكلك اليومي أمر مفيد، بس لازم كمان تحافظ على كمية الكالسيوم اليومية اللي بتحصل عليها، لذلك حاول ماتتناولش أكتر من 3 كوبايات حليب أو زبادي يوميًا.
  • ماتاخدش مكملات الكالسيوم من غير استشارة الطبيب الأول.
  • لو كنت بتحب الليمون لدرجة إنك تشرب ليمون كل يوم، فالأفضل إنك تشربها عن طريق شفّاطة لحماية أسنانك.
  • خليك فاكر دايمًا إن نجاح الدايت الأساسي في إنك تقلل من السعرات الحرارية اللي بتستهلكها في اليوم، وكمان إنك تقدر تضيف مواد غذائية ممكن تمنحك الكمية الكافية من الفيتامينات اللي بتساعد جسمك في عمليات التمثيل العذائي، من غير أدوية ولا حاجة.
  • فيتامين C _أو الفيتامينات عمومًا_ تعتبر حساسة تجاه الحرارة، علشان كده لما الليمون بيتسخّن على النار، فيتامين C بيقل فيه جدًا. الأفضل إنك لو هتشرب عصير ليمون يبقى تحط مياه دافية شوية.

    المصادر

  • gethealthycairo
  • nlm.nih.gov

Comments

comments

(Visited 108 times, 1 visits today)

عن Eng.Ahmed

شاهد ايضا

العالم محاكاة كمبيوتر: عرض ترومان المستمر

العالم محاكاة كمبيوتر: عرض ترومان المستمر

كتب: أحمد حسين سنة 1998، صَدَر فيلم «عرض ترومان» أو The Truman show، من إخراج …