المعادن: البرتقالة التي أنقذت الرجل!

كتبت: يارا كمال

جدو كان عيان الفترة اللي فاتت، ومن قلة الأكل بقى عنده نقص شديد في الأملاح، حسب ما قال الدكتور، وبقى محتاج محاليل عشان يعوّض النقص ده. بابا وقتها قال لي إن قد إيه الأملاح دي مهمة لدرجة إنه كان يعرف راجل كبير صحته كويسة أوي لدرجة إنه نزل يلعب كورة، وفي وسط الماتش مات. وقالوا إنه مات من قلة البوتاسيوم، ولو كان وقتها حد لحقه ببرتقانة كان زمانه عايش!

الفكرة مش في الأملاح. الفكرة في المعادن. أغلب المعادن اللي بنحصل عليها من الغذا بتكون في هيئة أملاح قابلة للدوبان في الميه. لما الأملاح دي بتدوب، بتتفكك لكاتيونات (اللي هي ذرات ليها شحنة موجبة لإن عدد الالكترونات أقل من عدد البروتونات اللي فيها)، وأنيونات (اللي هي ذرات ليها شحنة سالبة لإن عدد الالكترونات أكتر من عدد البروتونات). الكاتيونات والأنيونات دي اللي هي العناصر اللي بتتكوّن منها الأملاح اللي هي المعادن.

طب يعني إيه أملاح؟ الملح اللي بنحطه على الأكل؟ ويعني إيه معادن؟

طيب مبدئيًا الأملاح هي مركبات بتتركب عن طريق معادلة حمض بمادة تانية بيتقال عليها مادة قاعدية. ملح الطعام ده نوع من الأملاح. المشكلة بقى في المعادن إن فيه تعريفين بالإنجليزي ترجمتهم بالعربي معادن، اللي هما metal  وmineral، اللي بنتكلّم عليه هو الـmineral  وملناش دعوة خالص بالـmetal . فأي كلام لينا دلوقتي عن المعادن هو عن الـminerals.

المعادن بقى أو الـminerals  هي مواد صلبة غير حيوية (يعني مصدرها مش الكائنات الحية) موجودة في الطبيعة، وليها هيكل داخلي منظم وتركيب كيميائي واضح.

المعادن بشكل عام وظيفتها:

  • إنها مكونات أساسية للهيكل العظمي والأسنان.
  • بتنظم التبادل ما بين الميه والمواد الدايبة فيها في الجسم.
  • كمان المعادن مكونات أساسية للأنسجة الرخوة، ودي الأنسجة اللي بتوصّل وبتدعّم وتحيط بتراكيب الجسم التانية. الأنسجة الرخوة زي الدم والدهون والعضلات والأوتار وبطانة المفاصل.
  • المعادن أساسية كمان في نقل النبضات العصبية وانقباض العضلات.
  • المعادن كمان بتلعب دور في ظبط التوازن بين المواد الحمضية والقاعدية في الجسم.
  • المعادن مكون أساسي في كتير من الإنزيمات والفيتامينات والهرمونات ومواد تانية في الجسم زي الهيموجلوبين، بالإضافة للمواد المساعدة في التمثيل الغذائي والمحفزات ومنشطات الإنزيمات.

طيب إيه بقى المعادن اللي بنحتاجها في جسمنا؟

بصوا فيه معادن تركيزها كبير في الجسم ومعادن تركيزها قليل. المعادن اللي تركيزها قليل زي الحديد والزنك والنحاس والسيليكون، أما المعادن اللي تركيزها كبير بتتقسم لحاجتين: كاتيونات وأيونات. زي ما قلنا إن الأملاح بتتحلل لكاتيونات وأيونات. الكاتيونات الأساسية هي الكالسيوم والماغنسيوم والصوديوم والبوتاسيوم، أما الأنيونات هي الفسفور والكلورين والكبريت. خلينا في العناصر اللي بتركيز عالي عشان مطوّلش عليكم، ونشوف إيه أهميتها، ونقصها بيعمل إيه، وموجودة في إيه من الأكل.

1- الكالسيوم .. مابيشربش اللبن الصبح وكل أصحابه ضحكوا عليه:

طبعًا الكالسيوم مشهور بأهميته في بناء العضم، وشوف بقى كم الناس اللي مابيحبوش اللبن واستحملوا يشربوه عشان ماما ومحمد فوزي وكل الناس قالوا لهم إنهم لازم يشربوا لبن عشان يكبروا. طبعًا الكالسيوم مكوّن أساسي في العظام والغضاريف، كمان هو مهم في تجلّط الدم، عشان لما نتجرح الدم يتجلّط ومايفضلش ينزف.

كمان الكالسيوم بيحفز إفراز إنزيمات مهمة زي الكولين وده إنزيم الجهاز العصبي بيحتاجه عشان يشتغل بشكل سليم، وزي كمان إنزيم الليباز اللي بيفرزه البنكرياس اللي بيكسّر الدهون اللي في الأكل عشان الأمعاء تمتصها (ده غير الأنسولين والجلوكاجون، الهرمونين اللي بيكسّروا السكر في الدم).

الكالسيوم ومادة تانية اسمها الفسفوليبيدات، اللي بتبني جدار الخلية، بيلعبوا دور في تنظيم مدى نفاذية جدار الخلية وده مرتبط بقدرة الخلية على إن المغذيات تخش لها، وإن المواد تدخل وتخرج حسب احتياج الخلية. كمان الكالسيوم مهم لامتصاص فيتامين ب12 في القناة الهضمية.

الكالسيوم موجود طبعًا في اللبن والجِبَن والزبادي، وكمان العسل الأسود، ودي من أكتر الحاجات اللي فيها كالسيوم. هو كمان موجود في الكرنب واللوز والبندق والبروكلي والسردين والتين المجفف وغيره.

لو ما أخدناش كالسيوم كفاية بقى إيه اللي هيحصل؟

أولًا، الجو بتاع الواد اللي اسمه عادل، لإن الكالسيوم لما بيقل في جسمنا، بنوصل لمرحلة هشاشة العظام، العظام هي مخزن الكالسيوم من الأخر والسحب عليها هيزيد لحدد ما توصل لمرحلة الهشاشة، وده مرض بيصيب كبار السن خصوصًا الستات، وبيخلي عضامهم ضعيفة ومسامية وسهل إنها تتكسر. كمان المرض ده ممكن يصيب حد عنده نقص في فيتامين د اللي بيساعد على امتصاص الكالسيوم في الجسم.

فيه كمان دراسة بيّنت إن الستات اللي بيتناولوا 1200 جرام من الكالسيوم يوميًا بتقل الأعراض اللي بتسبق الدورة الشهرية عندهم بنسبة 50%. الأعراض دي زي الصداع والتقلبات المزاجية والرغبة الشديدة في الأكل والانتفاخ. وفيه دراسة تانية بتقول إنه بيساعد في تقليل آلام الدورة.

كمان كساح الأطفال بيبقى سببه قلة الكالسيوم أو قلة فيتامين د. الكساح بيبقى عبارة عن ضعف العظام. والعلم لسه مختلف حوالين تأثير الكالسيوم على تقليل الكوليسترول، ودوره في فقدان الوزن.

بس برضه كل شيء يزيد عن حده يتقلب ضده، لإن كُتر الكالسيوم ممكن يعمل إمساك وممكن يتعارض مع امتصاص الحديد والزنك. وممكن كمان يعمل حصوات في الكلى، بس في الغالب محدش بيوصل للمستويات المضرة من الكالسيوم من الأكل بس، وفي الغالب بيبقى بسبب الجرعات الزايدة من مكملات غذائية بتحتوي على الكالسيوم.

فيه كمان بعض الدراسات بتقول إن زيادة الكالسيوم بتزوّد خطر الإصابة بسرطان البروستاتا وأمراض القلب، بس لسه العلم ماوصلش لأسباب ده.

اعرفوا أكتر عن الكالسيوم من هنا: عن ”الكالسيوم“: الموضوع أكبر من العظام بكتير!

2- الصوديوم .. عليت لي ضغطي يخرب بيتك:

maxresdefault (2)

قولنا يعني إيه أملاح. أول حاجة بتيجي في دماغك لما بنقول ملح بتبقى ايه؟ أكيد ملح الطعام إن لم تكن الحاجة الوحيدة اللي بتيجي في دماغك. ملح الطعام اللي هو كلوريد الصوديوم، يعني كلورين متحد مع صوديوم.

الملح بقى بيفكرني بجدتي وجدي لما بيقللوا الملح في الأكل عشان ضغط دمهم بيعلى. الصوديوم فعلًا بيحافظ على ضغط الدم وحجمه عشان بيجذب الميه وبيحتجزها، بس زيادته طبعًا ممكن ترفع الضغط مع الناس اللي ضغطها عالي أصلًا.

كمان الصوديوم بينقل الإشارات العصبية ومهم في حركة السوائل داخل وخارج الخلايا، ده غير إنه بيساعد في توازن المواد الحمضية والقاعدية في الجسم برضه، وليه دور في امتصاص الكربوهيدرات.

الصوديوم موجود في السوائل اللي خارج الخلايا، وبالتالي لما بيقل في السوائل دي، الميه بتتحرّك لداخل الخلايا عشان تعمل توازن، وده بيخلي الخلايا تنتفخ. أكتر خلايا بتكون حساسة للانتفاخ ده هي خلايا المخ. عشان كدة نقص الصوديوم بيسبب الصداع والتعب والتشنجات وفقدان الشهية وضعف العضلات والغثيان والأرق والقيء.

والعكس برضه، لو حد بيحط ملح كتير على الأكل (يعني فيه صوديوم كتير بيخش جسمه) ده بيخلى السوائل اللي بره الخلايا تزيد وكمان حجم الدم في الأوعية الدموية، يعني ضغطه بيعلى وده معناه إن القلب هيبذل مجهود أكبر. الشغل والضغط الكتير دول هيخلوا الأوعية تتصلّب وده ممكن يعمل أزمة قلبية أو سكتة دماغية. الصوديوم مش بس موجود الملح، لأ كمان موجود في الخضروات ومنتجات الألبان واللحوم.

3- الكلورين .. أخو الصوديوم لزم:

shutterstock_183015443

أنا بقول عليه أخوه عشان بيبقوا مرتبطين ببعض عشان يعملوا ملح الطعام. الكلورين بيبقى موجود في الجسم كأيون سالب (ذرة ليها شحنة سالبة) اسمها الكلوريد.

الكلوريد برضه دوره إنه يظبط السوائل اللي في الجسم، زائد إنه جزء مهم في العصارات الهضمية. كمان بيلعب دور في نقل الأوكسجين وثاني أكسيد الكربون في الدم.

الكلوريد موجود في الطماطم والخس والكرفس والزيتون بكميات كبيرة. نقص الكلوريد ممكن يخلي الجسم يفقد كم كبير من السوائل اللي فيه عن طريق العرق الزايد والقيء والإسهال، بس برضه زيادته عن طريق الأكلات المملحة ممكن تعلّي ضغط الدم وتؤدي لقصور في القلب وتليف الكبد وأمراض الكلى.

4- البوتاسيوم والبرتقالة التي أنقذت الرجل:

orange

تعالوا بقى نعرف البوتاسيوم فعلًا دوره إيه في جسم الإنسان ونقصه ممكن يعمل إيه، ويا ترى موضوع البرتقانة اللي اتكلمنا عليه في أول المقالة ده حقيقي ولا أي فتي.

الجسم بيحتاج البوتاسيوم عشان يبني البروتينات جواه ويبني العضلات وعشان يحلل الكربوهيدرات ويستخدمها.  كمان البوتاسيوم بيحافظ على نمو الجسم بشكل طبيعي، وعلى توازن المواد الحمضية والقاعدية في الجسم، وأهم حاجة إنه بيتحكم في النشاط الكهربي بتاع القلب.

نقص البوتاسيوم ممكن يسبب الإمساك والتعب وتلف العضلات وضعفها والتشنجات فيها، وإن قلبك يتخطى دقات يعني مايكونش في انتظام في ضربات القلب، والحتة دي بتفكرني بغنوة لمحرم فؤاد بتقول ”دقاتك مش دي دقاتك لأ وحياتك ناقصين دقة. فين وديتها؟ مين اللي خدتها؟“. فلو البوتاسيوم قل زيادة في الجسم، ممكن نبض القلب يضطرب، ولو قل أوي أوي ممكن القلب يقف.

نقص البوتاسيوم في الجسم بيحصل نتيجة المضادات الحيوية، الإسهال، الترجيع، أمراض الكلى المزمنة والعرق.

البوتاسيوم موجود في البرتقان والموز والجزر واللبن والسبانخ والطماطم والجزر واللبن والبسلة والفاصوليا. بس الناس اللي عندهم أمراض كلى وخصوصًا اللي بيغسلوا كلى مش المفروض ياكلوا أكل غني بالبوتاسيوم.

نرجع بقى لموضوع البرتقانة. البوتاسيوم اللي في البرتقان فعلًا بيساعد في تقليل ضغط الدم. وفيه دراسة بتقول إن أكل البرتقان بيقلل خطر السكتة الدماغية بنسبة 19%. وفيه دراسة اتعملت سنة 2012، إن الناس اللي بتستهلك 4069 جرام بوتاسيوم كل يوم بيقل خطر الموت عندهم بأمراض القلب بنسبة 49%  مقارنة بالناس اللي بيستهلكوا 1000 جرام بوتاسيوم كل يوم.

طبعًا مانقدرش نقول الراجل ده كان هيعيش بسبب البرتقانة ولا لأ، بس بشكل عام ده بيقول قد إيه البوتاسيوم مهم لحياتنا.

بس برضه البوتاسيوم الكتير مضر، وده ممكن يحصل نتيجة إن الكلى مش قادرة تتخلّص من البوتاسيوم الزيادة، أو وجود حروق في أماكن كبيرة في الجسم، أو بسبب أدوية الضغط، أو تلف في خلايا العضلات أو الخلايا بشكل عام بسبب إدمان الكحوليات أو الجراحة أو العلاج الكيميائي، أو النزيف الشديد من المعدة والأمعاء، والأورام، أو الإصابة بمرض أديسون (وده إن الغدد الكظرية مابتفرزش كميات كفاية من الهرمونات اللي المفروض تفرزها) والبوتاسيوم الزيادة بسبب المكملات الغذائية.

زيادة البوتاسيوم ممكن تسبب الغثيان والنبض البطيء أو الضعيف أو غير المنتظم، وممكن تخلي القلب يبقى بطيء أو يقف خالص.

5- الفسفور اللي بينوّر:

1280x720-dcF

سيبكم بقى من جو إن الفسفور بيزوّد القدرة الجنسية وبتاع، الفسفور أهم كدة بكتير، سواء كان الكلام ده صح أو غلط. أولًا، الحمض النووي (DNA)، اللي هو المادة اللي بتحتفظ بمعلوماتنا الوراثية وتخليها تتّرجم لصفاتنا اللي احنا عايشين بيها، بيتكوّن من سلاسل طويلة من جزيئات بتحتوي على الفوسفات (اللي هو ملح الحمض الفسفوري).

كمان الفسفور ليه دور في تكوّن العضم والأسنان، وبيلعب دور كبير في استخدام الجسم للكربوهيدرات والدهون. كمان هو اللي بيعمل البروتين اللي بيخلي الجسم ينمو وبيصلّح الخلايا والأنسجة. غير كده الفسفور بيساعد الجسم يعمل (ATP)، وده الجزئ اللي الجسم بيستخدمه عشان يخزّن طاقة.

والفسفور مع فيتامين ب بيساعدوا في إن الكلى تشتغل وإن العضلات تتقلّص وإن نبض القلب يكون طبيعي، وكمان في الإشارات العصبية. الفسفور موجود في الأكلات الغنية بالبروتين زي اللحمة والدواجن والأسماك ومنتجات الألبان والمكسرات والبقوليات، والقرنفل والثوم وغيره.

فيه دراسات كتير بتقول إنه لو الفسفور زيادة في الجسم، ده بيرتبط بزيادة خطر الإصابة بأمراض القلب والأوعية الدموية. وكل ما تزيد كمية الفسفور، كل ما يزيد الاحتياج للكالسيوم. والتوازن بين الكالسيوم والفسفور مهم لكثافة العضم، لإن التوازن ده لو محصلش ممكن ده يأدي لهشاشة العظام.

لو الفسفور ناقص في الجسم، ده بيعمل وجع في العضم وضعف العضلات. ونقص الفسفور بيكون بسبب إدمان الكحول ومضادات الحموضة والمجاعة وقلة فيتامين د وفرط في نشاط الغدة الجار درقية.

6- الماغنسيوم .. أنت بابا وأنت ماما وأنت أنور وجدي:

Magnesium material on the periodic table. Part of a series.

مبدئيًا كدة احنا بنستخدم المغنسيوم في أكتر من 300 تفاعل بيوكيميائي في جسمنا. الماغنسيوم بيحافظ على أداء وظيفة الأعصاب والعضلات بطريقة طبيعية، وبيدعم جهازنا المناعي، وبيحافظ على انتظام نبض القلب، وبيساعد العضم على إنه يفضل قوي. كمان الماغنسيوم بينظم مستوى الجلوكوز في الدم وبيساعد في إنتاج الطاقة والبروتين. فيه حاجة تانية ناقصة؟ يعني الراجل هيعمل إيه تاني. يعني بيفكرني بالموظف اللي زمايله حاطين كل ملفاتهم عنده.

الماغنسيوم موجود في الخضار الورقي اللي لونه أخضر غامق، وكمان في الموز والمشمش المجفف، والمكسرات زي اللوز والكاجو، والبسلة والفاصوليا واللبن وغيره.

صعب إن الماغنسيوم يزيد في الجسم، لإن الجسم بيتخلّص من أي كميات زيادة. وبرضه صعب إن الماغنسيوم يقل أوي في جسمك بسبب إنه مش موجود في أكلك بشكل كافي، بس لو حصل ده هتعاني من فرط الاستثارية (إنك تستثار بشكل غير معتاد أو زيادة عن اللزوم)، والنعاس وضعف العضلات.

بس نقص الماغنسيوم  ممكن يحصل فعلًا عند مدمنين الكحوليات أو الناس اللي بيمتصوا نسبة أقل من الماغنسيوم بسبب إصابتهم بالحروق أو تناولهم لأدوية معينة أو بسبب قلة الكالسيوم في الدم أو مشاكل في الامتصاص أو الجراحة.

أعراض نقص المغنسيوم في الحالات دي ممكن تكون أعراض مبكرة زي فقدان الشهية والتعب والأرق والذاكرة الضعيفة وانخفاض القدرة على التعلم، وفيه أعراض متوسطة زي النبض السريع، وفيه أعراض شديدة بقى زي تقلص العضلات المستمر والهذيان والهلوسة والتنميل.

7- الكبريت .. عشان الأنسولين:

ومسك الختام بقى الكبريت. المعدن ده مكوّن ضروري لحمضين أمينيين مهمين عشان يدّوا البروتينات شكلها، وكمان مكوّن ضروري في هرمون الأنسولين. الكبريت موجود في السمك وبيض الفراخ.

وأخيرًا على رأي عبد الملك زرزور:”الإنسان دعيف”، يعني تخيّلوا ازاي احنا ممكن نتبهدل قد إيه لو معدن من دول مش موجود في جسمنا أو قل حتى، ده كل ده المعادن اللي موجودة بكمية كبيرة بس وماقولناش المعادن اللي بكميات قليلة. عشان كده أهم حاجة عشان نحافظ على صحتنا إننا ناكل من كل حاجة بكميات معقولة، وخير الأمور الوسط.

المصدر:

chemistry  fao.org  gly.uga.edu  hyperphysics  chemwiki

bbc.co.uk  epa.gov  pmep.cce  umm.edu  telstar.ote

ods.od.nih  mayoclinic  nlm.nih.gov  chemistry

extension  hsph.harvard  mayoclinic1  livescience

nytimes  nlm.nih.gov1  nlm.nih.gov2  lpi.oregonstate

livescience  nlm.nih.gov3  mayoclinic2  nlm.nih.gov4

mayoclinic3  umm.edu  nlm.nih.gov6  nlm.nih.gov5

lpi.oregonstate2  nlm.nih.gov7  merriam-webster

تعليقات

comments

(Visited 45 times, 1 visits today)

اترك رد