إلى ضحايا الربيع وموسم تزاوج النباتات .. إحنا كتير!

كتبت: مها طـه

في نفس الوقت من كل عام، تلاقي الجميلة سعاد حسني، صوتها مالي كل الأماكن، وهي بتغني ”الدنيا ربيع والجو بديع قفلّي على كل المواضيع“، فالربيع عندها هي وكتير من الناس يعني ورد وشجر وشمس بتنور الدنيا، جو حلو لا برد ولا حر، وكمان أمراض وحساسية وتراب ورياح خماسين!!

أما بالنسبة للأشخاص _أمثالي_ اللي بيعانوا من التهابات الجيوب الأنفية، فالربيع هو الحجيم بعينه، الربيع يعني صداع، رشح، ورم في العين، وألم في الأنف بشكل متواصل بقى. شوية تراب كفيلين يقعدوك في البيت أسبوع، مش قادر تقوم ولا تتحرك، ده طبعًا غير االاستفادة الاقتصادية العظيمة اللي بتحققها شركات تصنيع الورقيات أو المناديل يعني في الوقت ده من السنة على قفايا أنا وأمثالي. عشان كده قلت أرحب بالربيع على طريقتي، وأعلن تضامني مع ضحايا الربيع ومواسم تزاوج  النباتات، مرضى التهاب الجيوب الأنفية، وأقولهم إنتوا مش لوحدكم إحنا كتير أوي لأ ريلي كتير!

الجيوب الأنفية .. أين أشيائي؟!

بالنسبة لنا طبعًا الجيوب الأنفية دي موجودة عشان تعكنن علينا، الحقيقة إن معظمنا فاكر إن الجيوب الانفية عبارة عن جزء من الأنف، ووظيفتها زي الزايدة الدودية كده، مالهاش لازمة، غير إنها أحيانًا بس تلتهب عند بعض الناس وتخنقهم. خلونا نعرف الأول إن الجيوب الأنفية بتبقى عبارة عن مساحات مليانة بالهواء، موجودة داخل عظام الجمجمة والوجه، واتسمت بالجيوب الأنفية لأنها بتفتح كلها في تجويف الانف، وبتكون ليها وظايف مختلفة، بما فيها تخفيف وزن الرأس وتدفئة وترطيب الهواء المُستنشق وزيادة رنين الكلام أو بمعني تاني زيادة وضوحه وقوته، بالإضافة لإنها بتُمثل مناطق حماية للتراكيب الحيوية اللي في الوجه في حالة حدوث أي صدمة أو حادثة.

CDR713969

الجيوب الانفية عبارة عن أربع مجموعات موجودة في:

  • الفك العلوي ـ Maxillary sinus: ده أكبر جيب في الجيوب الأنفية، بيكون هرمي الشكل، قاعدته موجودة في منطقة الوجنتين، وقمته، موجودة تحت العين. الجيب ده بيتسمى بالجيب الفكي، وبيبقى مستواه تحت التجويف الأنفي بشوية، ويكاد يكون فوق الأسنان، وعشان كدة غالبًا الالتهاب في الجيب ده بيكون مصاحب له، ألم في الأسنان.
  • الجبهة ـ Frontal sinus: ودي الجيوب الأنفية الموجودة في عظام الجبهة، فوق العين، الجيوب الأنفية الأمامية بتبقى على شكل قمع، وبتفتح في التجويف الأنفي من فوق، وبيكون في فرق ملحوظ في الحجم بين الجيب اليمين والجيب الشمال، وبيفصل بينهم حاجز عظمي، وعادةً ما بيكون منحرف ناحية واحد فيهم أكتر.
  • الجيب الوتدي ـ Sphenoid sinus: الجيوب الوتدية تقع في نص الجمجمة، وبتنشأ في الاصل من عظمة الوتدية _عظمة موجودة في منتصف الجمجمة_. بيقسمها الحاجز العظمي لنصفين، يمين وشمال، حجم الجيب الوتدي بيختلف من شخص للتاني، وأحيانًا ممكن يوصل لحد الثقب الكبير _مكان إتصال المخ بالحبل الشوكي_ في الجمجمة.
  • الجيوب الغربالية ـ Ethmoidal sinus: دي الجيوب الأنفية الموجودة على جانبي التجويف الأنفي، في المكان اللي بتبقى عليه النظارة، وعشان كده الشخص اللي بيبقى عنده التهاب في الجيوب الأنفية بالنسبة له لبس النظارة لوقت طويل شئ متعب جدًا، الجيوب الغربالية، اتسمت كدة لأنها بتكون شكل كأنه خلايا منفصلة عن بعضها، وكأنها ممرات هواء، بيكون شكلها هرمي، وبيفصل بينها حواجز رقيقة.

حساسية والتهاب الجيوب الأنفية … العالم مكان قاسي!

أما بقى عن التهاب الجيوب الأنفية، فهو التهاب في الطبقة المُبطنة للجيوب الأنفية، والسبب في الالتهاب ده إما بيكون عدوى بكتيرية أو فيروسية أو أي مادة مُسببة للحساسية، أو في تفسير تاني محتمل للإصابة بمرض الجيوب الأنفية، وهو إنه لما المخاط بيتراكم في الجيوب الانفية، ويحصل شئ يعوقه عن النزول بشكل طبيعي، فده بيؤدي لحدوث الالتهاب.

في حالة الإصابة بعدوى معينة، فالجيوب الأنفية اللي مليانة هواء دي بتتملي بالمخاط لأن في حالة العدوى بيحصل تهيُج في الأغشية المُبطنة للتجويف الأنفي وللجيوب الأنفية، فبيتسرب المخاط ليها ويتراكم بشكل كبير وهو ده سبب الأعراض المُصاحبة عادةً للإصابة بمرض الجيوب الأنفية.

أعراض الإصابة بالتهاب الجيوب الأنفية .. إديني أمارة!

التهاب الجيوب الأنفية له نوعين: المُزمن والحاد، وغالبًا الالتهاب الحاد بيكون مُصاحب للإصابة بالبرد والإصابة بالعدوى البكتيرية والفيروسية، وبيستمر لمدة أسبوع تقريبًا، أما لو طوّل عن كدة فغالبًا ده بيكون الالتهاب المُزمن، واللي ممكن يكون سببه حساسية أو إهمال في علاج العدوى نفسها. أحيانًا بتحصل الإصابة بالتهابات الجيوب الأنفية المُزمن بسبب تشوه خلقي في الحاجز العظمي اللي بيفصل بين الجيوب الانفية أو عن طريق زوائد الجيوب الانفية (اللحمية).

من أهم الأعراض المُصاحبة لالتهابات الجيوب الأنفية هي الصداع سواء كان نصفي أو كلي، وده على حسب الجيوب الأنفية المُلتهبة، هل هي في النص اليمين أو الشمال بس؟ ولا فيهم كلهم أو في بعضهم في مناطق مختلفة؟ الصداع غالبًا بيبقى أقوى الصبح. كمان من ضمن الأعراض، آلام الفك العلوي والأسنان اللي غالبًا بترتبط بالتهاب الجيوب الفكية، وآلام في عظمة الوجنتين، كمان الالتهاب ممكن يتسبب في إن العين تبقى بتدمع بشكل مستمر، إلى جانب الورم الصباحي في جفون العين وعلى جانبي الأنف، وأحيانًا ممكن تتسبب في آلام في الحلق والأذن، ووجع في الرقبة، وارتفاع درجة الحرارة وأخيرًا بتختم بفقدان لحاسة الشم.

علاقة حساسية الجيوب الأنفية بالربيع!

Girl-sneezing-allergies

التهاب الجيوب الأنفية المُزمن غالبًا بيبقى مستمر طول السنة لكنه بيزيد في الربيع، لأن كل مُسببات الحساسية بتجتمع في الفصل ده من السنة سواء التراب أو رياح الخماسين بالإضافة لارتفاع درجة الحرارة اللي بتؤدي لتكاثر العفن بشكل أسرع. العفن بيبقى عبارة عن فطر ومليان بالجراثيم اللي سهل تدخل لمجرى التنفس عن طريق الأنف أو الفم، والجسم بيتعامل معاها كجسم غريب، وبالتالي بتسبب الحساسية وأخيرًا حبوب اللقاح!!

إحنا ضحايا مواسم تزاوج النباتات ..للأسف!

حبوب اللقاح بتُعتبر السبب الرئيسي لارتباط الحساسية عمومًا بالربيع، في الربيع بتتكاثر النباتات عن طريق حبوب اللقاح اللي بتطير في الهواء وبتسافر أحيانًا لمسافات عشان تلقح نبات تاني، وعشان كدة الدنيا بتزهر وتحلو والارض تلبس ألوانها في الربيع، المشكلة إن حبوب اللقاح دي غالبًا بيكون حجمها صغير لدرجة إنها ممكن بسهولة تدخل الأنف مع الهواء العادي، وفي حالة دخولها ده بيتطلب إن الجسم يدافع عن نفسه ضدها.

بمجرد دخولها الجسم بيبدأ يحاربها بإنه يبعت كرات الدم البيضاء للمكان اللي فيه حبوب اللقاح واللي سهل تمسك في المخاط اللي في الأنف، وبسبب محاربة كرات الدم البيضاء ليها، بتزيد كمية المخاط اللي بيبدأ يتراكم في الجيوب الأنفية نفسها ويؤدي لتكاثر البكتريا الموجودة فيها بشكل طبيعي، وفي الحالة دي بتحصل حساسية الجيوب الأنفية والتهابها.

وبالرغم من إن الربيع عاد من تاني والبدر هلت أنواره وكل حاجة إلا إننا معشر المصابين بأمراض الجيوب الأنفية، فعليًا ضحايا لهذا الفصل، اللي فيه تتكاثر النباتات وتزهر، وإحنا نصدع ونتعب، والحقيقة إن مش إحنا بس اللي بنتعب لكن كمان كل أخواتنا المصابين بأنواع الحساسية المختلفة، واللي بتظهر في الربيع، وكنصيحة أخيرة لكل المصابين بحساسية الجيوب الانفية، عليكم وعلى النقط والمياه المالحة، والبخاخات، معلش نستحمل بعضينا يا جماعة، ولو جم يومين تراب التزم بيتك، واحترس من حبوب اللقاح.


المصادر

تعليقات

comments

(Visited 29 times, 1 visits today)

اترك رد