التصلب العصبي المتعدد

أنا وضيفي المجهول!

كتبت: نورهان محسن

ضيف مجهول الهوية والمصدر، غامض يحمل في طياته الكثير من الأسرار و الخبايا. يدق الباب من عمر الـ20 إلي الـ40 سنة! ضيفي هو مرضي. مرض التصلب العصبي المتعدد  يا سادة، وبمناسبة اليوم العالمي لمرض التصلب المتعدد (MS) قررت أكتب وأشاركم تجربة شخصية مع ضيفي المفاجئ.

أنا نورهان محسن عمري 23 سنة. أيوةةةة لسه صغيرة…. أيوةةةة يعني “يا حرام لسه شابة”، كل ده سمعته وحفظته. بس هو مش “يا عيني” خالص ولا “يا حرام”. أنا لسه أنا وهفضل أنا مصدر طاقة إيجابية لكل اللي حواليا، لسه صوت ضحكتي يجيب بوليس الآداب 😀

عشان كده حابة أعرفكم على ضيفي لإن زي ما انتوا عارفين إكرام الضيف واجب.

التصلب العصبي المتعدد

اسمه: التصلب العصبي المتعدد، ولا أقولكم قولوا له يا واد يا (إم إس). مرض مناعي مزمن يصيب النساء أكثر من الرجال (خلبوص). فيه جهاز المناعة بيهاجِم الجهاز العصبي المركزي (المخ – العصب البصري – الجبل الشوكي)، وبيدمر غشاء الميلانين اللي بيحمي ويغطي المخ والأعصاب مما يؤدي إلي ظهور أعراض المرض في شكل ما يسمي بالهجمة أو الانتكاسة (attack).

الأعراض ممكن تكون تنميل تام في الجسم، مشاكل في الرؤية، صداع وإرهاق، التعب والدوخة، فقدان التوازن والاتزان، رعشة، فقدان الإحساس والشعور، مشاكل في النطق، ضعف في الأطراف كلها أو جزء منها، وعادةً ما يظهر هذا الضعف أو الشلل في جهة واحدة من الجسم، أو في القسم السفلي منه و أسوأ الحالات شلل. تختلف الأعراض من شخص لآخر كما تختلف من هجمة لأخرى لنفس الشخص مع اختلاف شدة الهجمة.

طيب يعني إيه هجمة أو انتكاسة؟
هي زيادة ملحوظة في أي عرض قديم من أعراض المرض أو ظهور عرض جديد بشرط عدم وجود ارتفاع في درجة الحرارة، واستمرار العرض أكثر من 24 ساعة.

بس كل ده و ما اتكلمناش عن مواصفات فتاة أحلام الأستاذ (إم إس) اللي كنت أنا منهم الحمد لله “أسباب المرض”:

1- عوامل وراثية وأسباب جينية: يعني في حد من العائلة عنده أي مرض مناعي. أثبتت التجارب على التوائم المتماثلة أن الوراثة ليست العامل الوحيد للإصابة بالمرض. مع العلم إن نسبة إصابة ولادي بالمرض _مستقبليًا لو خلفت_ هي 1% – 3%، مقابل 1% فقط عند الأشخاص الآخرين.

2- أسباب بيئية: من المعروف إن كثير من الفيروسات لها علاقة بمرض التصلب اللويحي، واحتماليات يوجد العلاقة بين مرض التصلب اللويحي وبين فيروس إبشتاين – بار. وهو الفيروس المسبب لمرض كثرة الوحيدات العدوائية. وحتى الآن، ليس معروفا كيف ينشأ الفيروس ويتطور في الحالات الصعبة من مرض التصلب المتعدد.

3- أسباب أخرى: نقص فيتامين د ، الأمراض التي يختل فيها عمل الغدة الدرقية ، التهاب الأمعاء.

لكن السبب الرئيسي غير معروف حتى الآن وكل الأسباب دي مجرد اجتهادات طبية واحتماليات.

من الصعب تشخيص المرض في مراحله الأولى، لأن الأعراض غالبا بتظهر ثم تختفي، وممكن تختفي لعدة أشهر. حتي الآن لا يوجد علاج شافي للمرض، بنتعايش معاه بأدوية مثبطة للمناعة تعمل علي تأخير الهجمة وتساعد علي التحكم في بعض الأعراض.

بكده أكون شرحت لكم ضيفي على قد ما قدرت ودي بقى خريطتي للتعايش معه:

أولا: أهم حاجة حمد وشكر ربنا والرضا بقضاء الله. دايما في أوقات ضعفي أتكلم مع نورهان وأقولها يا بت مش يمكن ربنا بيميزك ولا بيختبرك معقول تخيبي ظن ربنا فيكي و تفشلي؟ عشان كده قررت الآتي:

1- هاخد الدواء باستمرار.
2- هاهتم بالأكل الصحي وهلعب رياضة ويوجا كمان.
3-هاهتم بنفسي وبجمالي.

4-هابني أحلام وهاكون عنيدة في الوصول ليها أكتر من الأول.
5- هاشتغل لإني قادرة، أنا ماكسحتش عشان أقعد في البيت.
6-هاسافر وهاخرج وهالعب.
7-وعشان مرضي والأدوية بتسبب اكتئاب فأنا هاتحدى ده بالرسم، هاكتب خواطر، هاصلي، هاسمع أغاني، ولما هاكون عايزة أعيط.. هعيط، حتي لو انت راجل عيط مافيش حاجه اسمها الراجل مايعيطش .

وأخيرًا المرض مش أخر المطاف وأنا مش هقف عند يوم تشخيصي بالمرض، أنا هاعيش وهاشتغل وهاحب وهتجوز وهخلف وهنجا عشان ببساطة مرضي ( التصلب المتعدد) بيعتمد علي نفسيتي و مزاجي، وأنا علاجي في إيدي وهو مزاجي و هاعمل اللي عليه والباقي علي اللي خلقني.

تعليقات

comments

(Visited 121 times, 1 visits today)

اترك رد