أخبار عاجلة
الرئيسية / مشاركات حرة / اظبط ساعتك على سرعة دوران الأرض!
سرعة دوران الأرض

اظبط ساعتك على سرعة دوران الأرض!

كتب: حسين مجدي القزاز
_طالب بكلية علوم جامعة عين شمس قسم فيزياء وكيمياء.

من بداية البشرية، المشاكل والمواقف بتخلي الإنسان يطرح أسئلة مش لاقي لها  إجابة، وساعتها بييجي دور العلم علشان يجاوب علي الأسئلة دي. طب ماشى هي الأسئلة دي قد إيه؟ الحقيقة عدد الأسئلة غير محدود، والعلماء بيحاولوا يجاوبوا علي أكبر قدر ممكن  منها بكل حماس.

نيجي لسؤال المرة دي، وهو بيخص البيت اللي إحنا كلنا ساكنين فيه، السؤال بيخص كوكبنا الأرض. خلينا نخش على السؤال على طول:

طالما كوكبنا بيدور حوالين نفسه ليه مش بنحس بدورانه ده؟ ليه مابندوخش مثلا!

خليني قبل ما أجاوب على السؤال نعرف شوية معلومات عن الكوكب.

كوكبنا بيدور حول نفسه بسرعة 1670 كيلومتر/ ساعة. بيتحرك في نفس الوقت حول الشمس بسرعة 1674 كيلومتر/ساعة.

طب دي سرعة كبيرة جدًا. والحقيقه السر ورا إننا مش بنحس بالسرعة دي. هو طبيعة حركة كوكب الأرض. بمعنى إن كوكب الأرض طريقة وطبيعة حركته والظروف اللي بيتحرك فيها هيا اللي بتخلينا مانحسش بده.

فمثلا لو إنت راكب طيارة وخلاص عملية الإقلاع تمت بسلام، ودلوقتي الطيارة مستقرة في الجو، ساعتها بتقدر تفك حزام الأمان عادي جدا وكمان تتمشى في طرقة الطيارة، بالرغم من إنها بتتحرك بسرعة كبيرة لكن إنت اللي مش حاسس  بده.

أهو كوكبنا بقى أكتر استقرارًا بكتييير جدًا من الطيارة. يمكن في الطياره ممكن تحس بسرعتها بقدر صغير لكن كوكبنا مستحيل ده يحصل، لأن الطيارة بيحصل لها مقاومة من الهواء والسحب اللي حواليها، وده طبعا بيسبب اهتزازات بنحس بيها.

يعني عاوز تقولي إن اللي بيخلينا نحس بحركة المواصلات، هي العوامل والظروف اللي بتتحرك عربية المواصلات فيها مش السرعه؟

بالظبط، خصوصا لو السرعة منتظمة. طب وده إزاي بيحصل على الأرض؟

كوكب الأرض بيتحرك في الفضاء بمعنى أصح في الفراغ. مافيش مقاومة هوا مفيش أي حاجة في المسار اللي بيتحرك فيه الكوكب تقريبا بتؤثر على حركته أو سرعته وده بفعل الجاذبية اللي بتخلي ليه مسار محدد زي كل الكواكب في المجموعة الشمسية بتاعتنا. وحتى لو كان فيه أجسام زي الشهب فهي ما بتأثرش في سرعة الكوكب لإنها بتتحرق في الغلاف الجوي حتي قبل ما تلمس سطح الكوكب.

طب إيه تاني؟ كوكبنا بيتحرك بسرعه منتظمه بشكل كبير. فاليوم بيكو تقريبًا 24 ساعة في كل الأيام، وده بيدل على انتظام سرعة حركة الكوكب حول نفسه وحول الشمس طبعا.

زمن دوران كوكبنا في حركته حول نفسه بيزيد ثانيه واحدة كل يوم. فلو سمحتوا يا جماعة كل يوم نظبط الساعة ونزودها ثانية علشان الكوكب ينبسط. 😀 لكن تفتكروا في 24 ساعه إجنا بقى هنحس بفرق ثانية واحدة تأخير في اليوم؟

طبعا لأ، مش هنحس بحاجة، وهو ده فعلًا اللي بيحصل، وعشان كده عمرنا ما بنحس بحركة كوكبنا.

Comments

comments

(Visited 5 times, 1 visits today)

عن Eng.Ahmed

شاهد ايضا

تتعامل مع مريض الاكتئاب

إزاي تتعامل مع المريض بالاكتئاب؟

 كتبت: ريهام نجيب _أخصائي أمراض نفسية وعصبية مستشفى المعمورة أسرة كاملة حياتها بتتأثر لما يكون …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *