أخبار عاجلة
الرئيسية / ليه وإزاي؟ / اضطرابات النوم: نفسي أفضل صاحي على طول!

اضطرابات النوم: نفسي أفضل صاحي على طول!

كتبت: يارا كمال

ممكن تكون بتشخّر وأنت نايم .. ممكن تكون بترفّص وأخوك يبقى مابيحبش ينام جنبك عشان ماتبهدلوش ضرب. دي كلها حاجات بسيطة. فيه ناس بيعانوا من اضطرابات في النوم، يمكن تكون ماتعرفهاش، وهنا هتتعرف على 5 منهم.

اضطرابات النوم .. ابدأ القايمة

أنت نايم؟ لأ مُت:

young woman trying to shut out the sound of her husband snoring

فيه ناس بتعاني من توقف التنفس أثناء النوم. على فكرة ده اضطراب نوم شايع، التنفس بيقف فيه 10 ثواني أو أكتر والشخص ده نايم. قلة الأكسجين بتخلي مخك يصحيك أو يدخلك في حالة نوم خفيفة عن اللي كنت فيها، وفي الحالتين، الموضوع ده هيأثّر على جودة نومك، وعلى جودة نوم الشخص اللي نايم جنبك لإن الحالة دي أحيانًا بتكون مصحوبة بشخير طويل.

مش قادر أقوم .. لأ بجد:

John_Henry_Fuseli_-_The_Nightmare

فيه ناس بتصاب بحالة اسمها ”شلل النوم“. الحالة دي مخيفة أوي، لإن الإنسان بيبقى صحي من النوم بس حاسس إنه مشلول، لإن الواحد مننا بيبقى مشلول في نوم حركة العين السريعة (REM sleep) في العادي.

بيبقى الواحد واعي تمامًا، بس مش قادر يتكلم ولا يتحرّك، وممكن يفضل عامل كده لمدة دقايق طويلة. فيه بعض الناس من اللي بيصابوا بالحالة دي بيحسوا كإنهم مخنوقين أو كإن حد بيضغط بشدة على صدرهم، وممكن يكون عندهم هلاوس بصرية كمان. حاجة سخيفة أوي. الحالة دي ممكن تتفاقم بسبب الحرمان من النوم، وبسبب تناول عقاقير معينة أو الإصابة باضطرابات نوم زي توقف التنفس أثناء النوم.

أنا بقــــــــــــــــــــــــــــــــــــــــــــــــــــــــــــــــــــــــــــــــــــع:

24-sleep-jerk.w750.h560.2x

مش أحيانًا تبقى نايم وفجأة كده وأنت في أمان الله، تلاقي نفسك هتقع، فتنتفض وتصحى؟ ده حصل لي أنا كمان. سبب ده لسه مش معروف. فيه آراء بتقول إنك لما بيحصل لك كده، بيكون بسبب إنك بدأت تحلم، قبل ما جسمك يعجز عن الحركة أثناء النوم، وفيه آراء بتقول إن ده نتيجة ثانوية لإن جهازك العصبي بيسترخي وأنت بتروح في النوم.

الموت علينا حق:

النوم

فاكرين في بداية فيلم ”اعترافات زوج“، لما فؤاد المهندس فضل يتكلّم وهو نايم، ولما شويكار حاولت تصحيه، قال لها: ”الموت علينا حق“، زي ما كان بيقول في حلمه؟

دي حاجة هتلاقي ناس كتير عملتها قبل كده، إنه ابتدى يقول الكلام اللي بيقوله في الحلم، ولو بيتخانق، ممكن يزعّق وهو نايم، أو حتى يضرب، ولما بيصحوا مابيفتكروش هما عملوا إيه. في الحالة دي، الجسم مابيبقاش مشلول تمامًا، في مرحلة نوم حركة العين السريعة ، وعشان كده الشخص النايم ده بيبتدي يمثّل اللي بيحلم بيه.  ده بيحصل في الغالب مع الأحلام الوحشة بس.

يا عالم .. ياهوووه .. راسي هتنفجر:

jdit81svqk6y2p6ve6bj

فيه متلازمة اسمها ”الرأس المنفجر“، ودي بتخلي الواحد يحس إنه سامع صوت عالي جدًا زي صوت انفجار قنبلة، وده وأنت بتروح في النوم أو بتصحى. المتلازمة دي بتأثّر على 1 من كل 10 من البشر وفي الغالب بتبدأ في حوالي سن الخمسين.

محدش عارف سبب الحالة دي، بس احتمال تكون بسبب تغيرات في الأذن الوسطى أو نوبة صغيرة بتصيب الفص الصدغي في المخ. مع ذلك، المتلازمة دي مش ضارة.

فيعني من الآخر، لو بيجيلك كوابيس وخلاص، يبقى احمد ربنا إنها جت على قد كده.   

المصدر:

newscientist

 

Comments

comments

(Visited 63 times, 1 visits today)

عن Eng.Ahmed

شاهد ايضا

العالم محاكاة كمبيوتر: عرض ترومان المستمر

العالم محاكاة كمبيوتر: عرض ترومان المستمر

كتب: أحمد حسين سنة 1998، صَدَر فيلم «عرض ترومان» أو The Truman show، من إخراج …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *