أخبار عاجلة
الرئيسية / الملف / حاكم الفطريات لكل لون معنى ومغنى
أنواع الفطريات

حاكم الفطريات لكل لون معنى ومغنى

كتبت – يارا كمال

الفطريات مش مجرد خميرة ومشروم. الفطريات ليها أنواع شكلها مدهش وغريب جدًا، منها اللي الجميل ومنها المقزز ومنها اللي ليها شكل عمرنا ماشفناه قبل كده.

عندك مثلاً فطر اسمه (Dacrymyces  Palmatus)، ده شكله من بعيد كإنه ورد، ومن قريب شبه التوكة بتاعة الراقصة الاسبانيولي. الفطر ده لونه أصفر زاهي، وبينمو على جذوع الشجر المكسية طحالب في غابات ” دوجلاس التنوب” الغرقانة مطر اللي في ولاية أوريجون.

witches' butter (2) witches' butter

يا نجمة كل ما ضيها يلمس حجر يعلى ويتحول قمر:

النجوم مش موجودة في السما بس، ولا حتى في البحر، النجوم كمان على الأرض. فيه فطر بيعيش على التربة اسمها “نجمة الأرض” عشان جسمه الخارجي اللي بيشيل الأبواغ (Spores)، اللي الفطر بينشرها عشان يتكاثر، بتتقسم وتتفتح وتاخد شكل النجمة.

 اكتشفوا النوع ده، وصوروه في شمال فلوريدا، وفيه أنواع كتيرة ومختلفة من نجمة الأرض موجودة في أمريكا الشمالية، زي نوع اسمه نجمة الأرض البهلوانية (Acrobatic Earthstar) بيبقى موجود في مقاطعة سان دييجو في كاليفورنيا في الغابات على أشجار البلوط.

النوع ده شبه البني آدمين شوية لإن الدراعات بتاعة النجمة بتبقى متنية لتحت شبه الرجلين، وفوقها راس كروية بتحمل الـ Spores  على ساق قصيرة، فشكلها بيكون كأنها راس على رقبة وتحتيها رجلين.

تحس إن الفطر ده شبه الباليرينا اللي واقفة على طراطيف صوابعها. الرجلين دي بتبقى متصلة بالمجموعة من الـ(Myclium) أو الأفطورة اللي قولنا قبل كدة إنها بتستخدم في جمع الأكل وأحياناً التكاثر، ومتصلة بأوراق نباتات واقعة ومتكسرة.

Earthstar (نجمة الأرض)

قرن بقنديل وقرن بيشمك:

 فيه بقى نوع من الفطريات اسمها Stinkhorn أو القرن النتن (لامؤاخذة يا جماعة على الاسم). النوع ده من الفطريات بيجذب نوعين من الدبّان: Flesh fly، Green bottle fly، ريحته وحشة وهي اللي بتجذب الدبّان  للجزء ده الفطر اللي بيحمل الـ Spores، وده بيساعد على انتشارها.

الجزء اللي بيحمل الـSpores غريب أوي. بيبتدي يطلع على شكل بيضة تحت التربة، وتفضل تكبر لحد ما تبقى قد كورة الجولف، وممكن تلاقيه بين يوم وليلة طلع، وقلب ريحة المكان كله. بعدين فيه حاجة زي الساق كده بتنمو جوة الجزء الي عامل زي البيضة ده لحد ما تكسره، وتفضل تطول زي ما انتوا شايفين في الصورة، الراس اللي بتبقى في آخر الساق دي بتبقى متغطية بحاجة لزجة زي الطين اللزج بيبقى فيها الـSpores.

Stinkhorn (القرن النتن) (2)

Stinkhorn (القرن النتن) (3)

فيه نوع تاني من الـ Stinkhorn، اسمه (Basket Stinkhorn).فاكرين البراقع اللي كانت الستات زمان تلبسها فوق الملاية اللف؟ أهو هو شبهها كدة وعامل زي الشَبَك زيها. الشبك ده مدلدل من راس الفطر. النوع ده من الفطريات بيتجفف، ويتباع في الأسواق الآسيوية عشان يتطبخ ويتاكل.

Basket Stinkhorn

من نفس النوع برضه فيه عيلة الـ(Ornate Stinkhorns). منها الـ Lantern Stinkhorn (Lantern  يعني مصباح). وهي اسمها كدة لإن راسها شبه المصباح فعلاً.  الراس دي بيبقى فيها شقوق طولية هي دي اللي يتجمع فيها الـ Spores. لما الراس دي بتنضج بيبقى ليها ريحة  وحشة برضه زي براز الكلب. فيه نوعين من الدبّان بتجذبهم الريحة دي:  Blow flies ، flesh flies.

Lantern Stinkhorn

فيه نوع تاني من الـ Lantern Stinkhorn اسمها (Lizard’s Claw Stinkhorn) لإن ليها صوابع شبه مخالب السحلية. النوع  ده موطنه أستراليا ونيوزلندا.

Lizard's claw Stinkhorn

فيه نوع اسمه Jack-o-Lantern Mushroom))، دي فعلاً بتضوي في الضلمة ضوء خفيف.

omphal4b omphal5b

فيه نوعين كمان من الـStinkhorn ، فيهم الفكرة الأساسية لشكل الـBasket Stinkhorn اللي هي الشَبَك: Stalked lattice stinkhorn (وده كإنه شَبَك متجمّع على ساق طويلة، والنوع ده موجود في جنوب الولايات المتحدة وشمال المكسيك)، Latticed stinkhorn (النوع ده شبه الأولاني في فكرة الشَبَك بس من غير ساق).

Stalked lattice stinkhorn

فيه نوع فطريات استوائي اسمه فطر نجمة البحر لإنه شبهها بالظبط. النوع ده بحاجة شبه البيضة بتظهر تحت الأرض. لما الفطر ده بينضج بيبقى ليه من خمس لعشر دراعات. الـSpores بتاعته بتبقى سودا ولزجة وموجودة في مركز النجمة، وبيبقى ليها ريحة زي اللحم المعفن. بقى الكائن الجميل ده ريحته تبقى عاملة كدة؟

Latticed Stinkhorn

فنجان حاجة تانية غير القهوة:

عارف قشرة المانجة لما تاكل اللي جواها أو قشرة البرتقان اللي كنت بتقلبها وتعصرها في عين صاحبك؟ أهو فيه فطريات اسمها الفنجانية أو (Cup fungi)  شبهها أوي. النوع ده من الفطريات فيه الأحمر اللي بيعيش على الجذوع المتغطية بالطحالب في شمال غرب المحيط الهادي، وفيها الملوّن اللي بيعيش في غابات دوجلاس التنوب في ولاية أويجون، ومنها كمان “كوب الروث” (Dung Cup)، اللي بتنمو على الروث والسماد والقش المعفن في الحظيرة والإسطبل والجناين.

cup fungi dung cup (كوب الروث)

الفطريات نزلت جدول:

فيه فطريات بتعمل دماغ. الفطريات دي خطيرة لإن فيها سموم بتصيب الجهاز العصبي. عمومًا الفطريات السامة بتبقى الـ Spores بتاعتها لونها أبيض، وفيه جزء زيادة شبه الكوباية في قاعدة الساق، وفيه حلقة على الساق نفسه، وفيه بقايا للغشاء اللي كان شايل الـ Spores قبل ما تنضج (Universal Veil) على الجزء اللي عامل زي الشمسية فوق الساق.

بس حتى الصفات دي بتزول مع الوقت، فمتبقاش بتتمشى في حتة، وتلاقي حاجة زي المشروم تقوم واكله، أنا مش مسئولة. لكن من الحاجات اللي مينفعش تتلخبط فيها الأمانيت الطائر(Amanita muscaria)، بطاقيته الحمرا والحتت البيضا المنشورة على الطاقية دي.

الفطر ده سام، لدرجة إن في أوروبا بيحطوه في أطباق مكشوفة عشان يقتل الدبّان، وفيه اللي بيعتقد إنه بيخدّر الدبّان بس، وبعد كده الدبانة بتفوق وتطير، وتستكمل حياتها عادي. النوع ده سام للإنسان كمان، بس فيه أنواع أخطر منه، وممكن تقتل لو بلعناها: أمانيت فالوسياني (قبعة الموت) أو (Death Cap)، ملاك الموت (Death Angle)، و(Panther Amanita). أساميهم أصلاً مرعبة.

الأمانيت الطائر

المشكلة، إن الأنواع دي فيها شبه من بعض أنواع المشروم. اللطيف بقى إن الأمانيت الطائر ده لما بيتاخد منه جرعات متقتلش بيعمل دماغ، يعني بيسبب هلاوس وهذيان. والموضوع ليه تاريخ كبير، يعني الدراسات بتقول إن احتمال إن مشروب السوما المقدس اللي كان الغزاة الآريين في الهند بيشربوه في الاحتفالات الدينية، يكون هو الأمانيت الطائر. كمان الهنود الحمر اللي في المكسيك وأمريكا الوسطى والشمالية، بيتناولوا أنواع من الفطريات اللي بتخلي الواحد يهلوس، ويسكر عشان يتواصلوا مع الآلهة.

ده غير إن فيه أحجار في جواتيمالا (دولة قرب المكسيك) بيرجع تاريخها لـ1000 سنة قبل الميلاد عليها أشكال لفطر شبه الأمانيت، وفيه أشكال شبه كدة برضه على الأواني في بيرو (دولة في أمريكا الجنوبية) والمخطوطات الميكسيكية، فيهم رسمة عبارة عن رسول على شكل حيوان بيدّي فطر الأمانيت المقدس للحاكم اللي قاعد على العرش.

ده حتى قصة أليس في بلاد العجائب مسلمتش من الفطر ده. فيه كتّاب بيعتقدوا إن اليرقة الخضرا اللي كانت أليس بتكلمها في القصة، اللي كانت بتشيّش دي، كانت واقفة على فطر لونه أبيض في أحمر في إشارة للأمانيت.

وكنا اتكلمنا في الموضوع اللي بيشرح يعني إيه  فطريات ، والأمراض اللي بتسببها، وقلنا إن فيه مرض اسمه الأرغوت بيصيب النبات، وإن الفطر اللي بيسبب المرض ده يعتبر مصدر لعقار الهلوسة الـ(LSD)، يعني بيعمل دماغ وببيسبب هلاوس وهذيان زي الأمانيت كده. وفي العصور الوسطى، آلاف الأوروبيين أصيبوا بمرض التسمم الأرغوني (Ergotism) وده بيسبب غرغرينا في الأطراف (عدم وصول الدم للأطراف) وتشنجات وجنون، وده بسبب إنهم أكلوا عيش الجاودار اللي كانت حبوبه مصابة بمرض الأرغوت.

منه الداء ومنه الدواء:

طبعاً الجزء اللي فات ده حسسك قد إيه الفطريات دي شريرة، بس على العكس فيه بعضها طيّب ومفيد، وبيستخدم في العلاج بالأعشاب خصوصاً في الصين.

حاجة زي فطر الـ(Ganoderma Lucidum) مثلا، ارتبط عند الصينيين بالطاقة الروحية وطول العمر، ويقال إنه بيحسّن الدورة الدموية، وبيقلل الكوليسترول، وبيقلل ضغط الدم، وبيقوي جهاز المناعة، وفيه صفات بتخليه مضاد للأورام.

وفيه نوع تاني اسمه (الفطر الشيتاكي) ده برضه مغذي جداً خصوصاً لو اتطبخ، واتقلى مع الشوربة والخضار، وبيتزرع في آسيا من زمن طويل. الفطر ده بيقلل ضغط الدم والكوليسترول، وبيساعد في علاج مرض السكر والسرطان، وبيحسّن الطاقة الجنسية.

في أنواع تانية كتيرة ومدهشة من الفطريات، اللي لها خصائص مميزة عنها وعن إزاي بتعيش، كملوا معانا في الجزء التاني.


المصادر: waynesword waynesword.palomar

Comments

comments

(Visited 62 times, 1 visits today)

عن Eng.Ahmed

شاهد ايضا

الخرافة والديناتولوجي: إحنا اللي دهنّا الهوا دوكو (الجزء الأول)

كتب: أحمد حسين ”المواهب .. طريقط للثراء والخلود والتأثير“ كتابٌ يؤكد مؤلفه من خلاله أن …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *