أغرب أنواع الفوبيا: اللي تخاف منه ابعد عنه!

كتب: أحمد حسين

الفوبيا كمصطلح يعتبر منتشر ومعروف لناس كتير إلى حدٍ ما. الفوبيا (الرهاب) هي كلمة مشتقة من الكلمة الإغريقية (Phobos) بمعنى الخوف، وبتستخدم الكلمة لوصف حالة الخوف أو القلق أو عدم الراحة في وجود شيء ما. مش بالضرورة يكون الشئ ده خطير ممكن يكون حاجة عادية لكنه في النهاية بيسبب خوف وقلق للشخص المصاب بالفوبيا دي. أسباب الإصابة بالفوبيا ممكن تبقى عن طريق التعرض لموقف مخيف من الشيء ده، أو سماع قصص مخيفة عنه، أو وراثيًا لو في حد في العيلة مصاب باضطراب القلق.

وبما إن في مجموعة أنواع كده من الرُهاب أو الفوبيا منتشرين، زي الخوف من الأماكن المغلقة (Claustrophobia) أو الخوف من الأماكن العالية (Acrophobia) مثلًا. فإحنا هنا هنحاول نجمع مجموعة تانية من أنواع الفوبيا غير المنتشرة واللي هتكون غريبة جدًا.

أغرب أنواع الفوبيا .. منها:

(Ablutophobia) أو فوبيا الخوف من الاستحمام أو غسل الجسم أو النظافة: في الأغلب بتيجي للأطفال والستات أكتر من الرجالة. النوع ده من الأنواع الحساسة أو الخاصة من الفوبيا، لأن المصابين بيه بيحسوا إنهم مش المفروض يتواجدوا في أي تجمعات علشان لو حد اتريق عليهم الموضوع هيزيد معاهم أكتر.

الـ(Acousticophobia أو Phonophobia) فوبيا الخوف من الأصوات: حد فاكر علاء مرسي في فيلم ميدو مشاكل لما كان عمال يقول “لا لا أرجوك، أرجووووك” وبيطلب منهم يوطوا صوتهم ومش مستحمل حتى صوت تزييق الباب، أهي الفوبيا دي بتكون حاجة شبه كده بس الفرق إن المصاب بيها بيخاف من كل الأصوات اللي في الدنيا، حتى صوته هو نفسه.

Acousticophobia

(Anthophobia) أو فوبيا الخوف من الورد: وهو نوع عجيب جدًا من الخوف لأنه مابيكونش مترتب بالضرورة على التعرض لموقف مؤذي له علاقة بالورد، لأنه في الغالب الورد ده شيء مش مؤذي، بس المصاب بالفوبيا دي بيخاف من الورد بمجرد ما يشوفه أو يفكر فيه حتى.

-(Atelophobia) فوبيا الخوف من عدم الكمال: نوع من القلق الشديد اللي بيخلي المصاب بيه خايف من عمل أي شيء لأنه خايف من إن الشيء ده يكون مش كامل. طبعًا السعي نحو الكمال ده شيء معظم البشر بيعملوه رغم استحالته، بس اللي عنده الفوبيا دي باختصار مابيعملش حاجة خالص لأنه خايف مايكونش كامل في أي حاجة بيعملها.

(Bathmophobia) أو فوبيا الخوف من السلالم: والخوف من السلالم هنا مش معناها الصعود أو النزول عن طريق السلم لا، الخوف هنا خوف من كل السلالم، الخوف حتى من رؤيتها والاقتراب منها.

الـ(Chaetophobia) فوبيا الخوف من الشعر: خوف بييجي للمصاب بالفوبيا دي لما بيشوف أي نوع من الشعر سواء شعر البشر أو شعر الحيوانات، والموضوع ساعات بيوصل لإن الشخص يخاف من شعر راسه وشعر جسمه كمان. من أعراض الفوبيا دي هي سقوط الشعر دون سبب واضح.

(Chromophobia) أو فوبيا الخوف من الألوان: والمصاب بالنوع ده غالبًا بيكون خايف من لون محدد، يعني في نوع من الفوبيا دي اسمه (Chlorophobia) وده الخوف من اللون الأخضر، فاللون الأخضر على أي حاجة بقى بيبقى مخيف بالنسبة للمصاب بالنوع ده من الفوبيا.

(Chronophobia) فوبيا الخوف من الزمن: تقريبًا مفيش حد مابيخافش الوقت يفوت بسرعة أو بمعنى أصح يفرط بسرعة من إيده، لكن المصاب بالفوبيا دي بيخاف خوف مرضي من تقدم الزمن بشكل عام يعني، وبيفضل عايش في قلق رهيب لمجرد تذكّر إن الساعة ماشية.

(Coulrophobia) أو فوبيا الخوف من المهرجين: سواء روحت في مرة السيرك أو ما روحتش فأكيد تعرف الـClowns أو المهرّجين، اللي بيبقوا مبهجين ومضحكين جدًا، لكن المصاب بالفوبيا دي بيشوفهم عكس كده خالص، ومش القصد إنه بيخاف من اللي شكلهم شرير زي بتوع أفلام الرعب كده لأ، بيخاف من أي مهرج حتى لو كان شكله لطيف.

(Cyberphobia) فوبيا الخوف من الكمبيوتر: أو الخوف من التكنولوجيا بشكل عام. ظهر المصطلح ده سنة 1985، لما ظهرت حالة خوف شديدة عند مجموعة من البشر من التعامل مع التكنولوجيا، لدرجة إنهم كان بيجي لهم أعراض مرضية زي كرشة النفس والتعرّق الشديد من مجرد رؤية مظاهر التكنولوجيا.

الـ(Eleutheromania) أو فوبيا الخوف من الحرية: بمعنى إن المصاب بيها مابيعرفش يكون حر في حياته خالص، مابيعرفش يحس بفكرة الحرية من الأساس ولازم يكون في حد بيتحكم فيه بشكلٍ ما. وده الحقيقة من أغرب أنواع الفوبيا اللي مرت عليا بشكل شخصي.

(Ergophobia) فوبيا الخوف من العمل: مش الخوف الطبيعي أو القلق لأ، فوبيا الخوف المرضي من العمل وأي بيئة تدل على العمل، يعني المصاب بالفوبيا دي بيخاف من فكرة الزمالة أو أماكن زي الشركات والمصانع وأي بيئة تدل على العمل.

-(Gynophobia) أو فوبيا الخوف من الستات: أغلب المصابين بيه بالطبع رجّالة، بس في عدد صغير من الستات بيخافوا برضه بشكل مرضي من الستات. الحالة دي تختلف عن حالة الـ (Misogyny) أو احتقار المرأة، المصابين بالحالة دي مابيحتقروش المرأة، بس بيترعبوا منها بشكل عام.

(Erotophobia) أو الخوف من الإحساس الجيّد بالجنس: بمعنى إن المصاب بالنوع ده من الفوبيا بيخاف من إنه يشعر شعور جيد داخل نفسه تجاه الجنس بشكل عام. وده يختلف عن (Sexophobia) وهو الخوف من ممارسة الجنس أو من الأعضاء الجنسية.

النوع الأخير ده شبيه بنوع تاني يطلق عليه (Genophobia) أو الخوف من العلاقة الجنسية أو الحميمية الطبيعة، بمعنى إنه المصاب بيها بيكون خايف من العلاقات الرومانسية توصل لعلاقات حميمية. في برضه نوع تاني ممكن نذكره بالمرة وهو نوع اسمه (Eurotophobia) وده الخوف من الأعضاء التناسلية للمرأة.

بالمناسبة.. بحسب علماء النفس، أغلب المصابين بالأنواع دي من الفوبيا هما المنتمين للجماعات الدينية المتشددة.

(Frigophobia) فوبيا الخوف من البرد: المصاب بالحالة دي بيكون دايمًا خايف يبرد لدرجة إنه يتلّج.

(Hexakosioihexekontahexaphobia): فوبيا الخوف من رقم 666 اللي هو بيعتبر في ديانات ومعتقدات كتير رقم الشيطان.

(Heliophobia) فوبيا الخوف من التعرض لشعاع الشمس: أيوه بالظبط، هو شمبليون اللي كان في فيلم ورقة شفرة.

(Hedonophobia) أو فوبيا الخوف من الإحساس بالمتعة: يعني، في ناس كتير ممكن تكون بتخاف من الإحساس بالذنب، دي مفهومة، أما المصاب بالنوع ده من الفوبيا فبيكون خايف من الإحساس بالمتعة بشكل ما يعني.

الـ(Haphephobia) فوبيا الخوف من اللمس: بمعنى خوف الشخص من إنه يلمس حد أو حد يلمسه، وبيحس ساعات إن اللمس ده حارق. معظم المصابين بالنوع ده من الفوبيا بيكونوا اتعرضوا في وقت ما في حياتهم لاعتداء بدني أو جنسي.

(Kinetophobia) فوبيا الخوف من الحركة: الأشخاص المصابين بالنوع ده بيخافوا من الحركة بشكل عام، سواء حركة الأشياء اللي حواليهم، أو حركتهم هما شخصيًا.

(Macrophobia) أو الخوف من الانتظار: حاجة كده شبه مطلع قصيدة محمود درويش ”في الانتظار، يصيبني هوس برصد الاحتمالات الكثيرة“، دي فوبيا حقيقية يا أستاذ درويش.

– (Nostophobia) فوبيا الخوف من الرجوع للبيت: معظم المصابين بالحالة دي بيكونوا اتعودوا بشكل ما على ترك بيوتهم والعيشة خارجها، فلما بيرجعوا لها بيحسوا بضيق شديد، علشان كده بيخافوا يرجعوا.

(Phagophobia) أو فوبيا الخوف من البلع: المصابين بالنوع ده بيخافوا يبلعوا علشان بيكونوا خايفين خوف مرضي من إنهم يشرقوا أو يتخنقوا من أيًا كان اللي هيبلعوه.

(Philophobia) أو فوبيا الخوف من الحب: أااه جينا للمهم، المصابين بالنوع ده بيحسوا بخوف من الإحساس بالحب بشكل عام، وبيميلوا أكتر للعزلة والوحدة علشان لا يحسوا بالحب ولا حد يحبهم. ويبقى يا دار ما دخلك شر.

الـ(Scriptophobia) أو فوبيا الخوف من الكتابة: المصابين بالنوع ده ممكن يصيبهم أعراض زي ضيق التنفس والدوار لما يفكروا في الكتابة، سواء في مكان عام، أو لو فكّروا فيها من الأساس.

(Uranophobia) فوبيا الخوف من الجنة: والموضوع هنا يتعلق بالخوف من دخول الجنة أو الخوف من عدم دخول الجنة.


المصادر:

oxforddictionaries  webmd

تعليقات

comments

(Visited 359 times, 1 visits today)

اترك رد